Xulio Viejo venceyó la esistencia d’un rexistru llingüísticu dominante cola d’una clase social que lu xenera

El filólogu Xulio Viejo abrió ayeri la segunda xornada del seminariu "llingua, clase y sociedá" que se desarrolla nel Campus d'Humanidaes de la Universidá d'Uviéu. Baxo'l títulu "El llinguaxe humanu: de la evolución natural al discursu social" el profesor de la universidá d'Uviéu abordó les característiques básiques del llinguaxe humanu, faciendo una puesta al día de la evolución del mesmu, amás de tratar los discursos que tan presentes na sociedá alredor del fechu llingüísticu, sobremanera no que se refier a la dimensíon social del usu llingüísticu y los discursos ideolóxicos derivaos d'elli.

Señaló que les llingües "nun determinen la visión del mundu" y recalcó "la igual dignidá de toles llingües frente a los prexuicios qu'espresen una supuesta desigualdá de los idiomes". Asinamesmo, Viejo llamó l'atención sobre'l fechu que "hasta'l 90% de les llingües falaes anguaño puen desapaecer a lo llargo del sieglu XXI". No tocante a la vinculación ente llingua y clase social, el profesor de la Universidá d'Uviéu recordó como les normes estandar de les llingües históriques "son productu d'un rexistru venceyáu dafechu a les clases de prestixu" mientres que pa elli, no que cinca a les rellaciones ente idioma y identidá "la llingua nun crea necesariamente mas qu'una identidá, la llingüística".

La segunda de les esposiciones de la mañana, que corrió al cargu de la filóloga Noemí Gonzalez García abordó'l tema de "llingua y clase social". Tres d'un repasu breve a la historia de la sociollingüística como disciplina, Noemí González afondó na sociollingüística marxista, especialmente na soviética, analizando'l so desarrollu y derivaciones. Asinamesmo analizó la concepción de la llingua nel primer marxismu al traviés d'estremaos testos de Marx, Engels y Paul Lafarge xunto coles consideraciones que fexo Stalin sobre llingüística al intervenir directamente nos debates d'esta disciplina na URSS. No referente a les rellaciones ente llingua y clase social, la filóloga señaló como "el fechu de pertenecer a una clase social fai que los individuos empleguen un rexistru o otru, o nel so casu, llingües distintes en sociedaes plurillingües" .