Xuiciu a un militante de la Xunta pola Defensa de la Llingua

Xosé Antón Cadierno Collar, militante de la Xunta pola Defensa de la Llingua Asturiana, enfréntase esti xueves a un xuiciu acusáu de dañar un cartel indicador a la entrada de la villa de Grau nel que se pintó la forma toponímica tradicional del llugar sobre la forma castellana. 8483'94 euros o un añu de privación de llibertá ye lo que pide'l fiscal inicialmente, una pitición que la Xunta Pola Defensa de la Llingua asturiana calificó nel so momentu de "escandalosamente desproporcionada y basada nuna interpretación claramente tendenciosa del Códigu Penal, que fae rescamplar la so intencionalidá política en contra de la reivindicación llingüística".

La vista polos fechos, asocedíos el pasáu mes de marzu, va tener llugar esti xueves 13 d'avientu nos xulgaos de Grau, asitiaos na plaza Longoria, énte los que la Xunta convoca una concentración de protesta a les 10 hores de la mañana. La organización recuerda que la toponimia tradicional asturiana sufre una "situación llaceriosa" y recuerda que la Llei d'Usu y Primoción del Asturianu de 1998 afirma que "Los topónimos de la Comunidá Autónoma del Principáu d'Asturies han tener el nome oficial na so forma tradicional", polo qu'acusa a la mesma alministración que falsificar los nomes de llugar.