Xube l'ayuda asistencial a los emigrantes asturianos n'Arxentina

L'Arxentina ye'l país del mundu donde viven más emigrantes asturianos. Datos del Censu de Residentes Ausentes demuestren que cerca de la cuarta parte de los asturianos inscritos nesti rexistru viven nesti país d'América del Sur, que dende últimos de la década de los 90 vive una crisis económica ensin comparanza dientro del contestu continental.

Tres dellos episodios d'agravamientu, l'añu 2.001 supunxo'l paroxismu de les apretures económiques arxentines, con un episodiu inflacionista qu'acabó d'esfarraplar los aforros de los ciudadanos. La emigración asturiana nun foi ayena a esta situación, y un bien de los nuestros emigrantes sufrieron les sos consecuencies, sobremanera los sectores d'edá de xente más mayor, que vieron como quedaben ensin derechu a asistencia sanitario.

Sicasí, la comunidá asturiana n'Arxentina contó cola ayuda del Centru Asturianu de Bonos Aires, entidá que caltuvo'l calter de sociedá de socorru que teníen los centros d'emigrantes na so época fundacional allá pel tránsitu del sieglu XIX al XX, un calter asistencial que'l Principáu d'Asturies ayudó a caltener dende l'aniciu de la crisis económica, qu'amenazó la mesma supervivencia del centru en cuantes que munchos socios nun teníen nin pa pagar les cuotes d'afiliación. Asina nel 2002, primer añu en que s'aprobaron ayudes sanitaries, Asturies punxo 24.040,48 euros que se repartieron ente 199 beneficiarios.

El Conseyeru de Rellaciones Esteriores Javier Valledor presentó esta mañana n'Uviéu acompañáu pol Director de l'Axencia d'Emigración, Luis Miguel Fernández Romero y los representantes del Centru Asturianu de Bonos Aires los datos de la campaña nueva d'ayuda sanitaria pa emigrantes ensin recursos. El presupuestu total pa esti exerciciu ye de 80.000 euros, colos que se cuenta con dar asistencia a 441 beneficiarios, ampliando con muncho la capacidá d'acción d'estes ayudes, pero'l programa asistencial del Principáu n'arxentina quier dar anguaño un pasu más cola creación d'ayudes pa emigrantes discapacitaos.

Asina, los responsables d'emigración dieron anuncia de que s'abre plazu hasta'l 30 de setiembre pa que los emigrantes con discapacidá de cualquier tipu pidan ayudes a l'alquisición de material ortopédicu (dende audífonos hasta sielles de ruedes) y otros elementos d'adaptación al entornu como absorbentes etc. Esti programa d'ayudes a discapacitaos ye nuevu dafechu y Asturies ye la primer comunidá autónoma n'aplicalu, según sorrayen los responsables de la Conseyería. Los datos de la convocatoria, que tien un presupuestu de 42.000 euros, puen consultase nel Boletín Oficial del Principáu d'Asturies del 23 de xunetu. Nesti primer añu de funcionamientu, el programa namás va empobinase a emigrantes asturianos residentes n'Arxentina, pero ye intención declarada de la Conseyería enanchalu a más países.

Xunta les ayudes d'asistencia sanitaria y a discapacitaos, ábrese tamién otra nueva convocatoria, esta pa residentes n'Arxentina y n'otros llugares, d'ayudes individuales a emigrantes que carezan situaciones de precariedá económica. El plazu ta abiertu hasta'l 17 de setiembre y el presupuestu ye de 300.000 euros, esistiendo amás una partida aparte de 72.000 euros pa subvencionar places en residencies pa mayores ensin recursos.