Xuba nes ayudes a centros asturianos

El Gobiernu asturianu adelantó esti añu la convocatoria d'ayudes pa los centros asturianos nel estranxeru. Estes ayudes pónense esti exerciciu nuna cantidá récord de más de 755.000 euros (más de 125 millones de pesetes). El conseyeru de Xusticia, Seguridá Pública y Rellaciones Esteriores, García Valledor, sorrayó qu'esta cantidá supón una xuba del 35 % respective a les ayudes del exerciciu 2.003, un añu nel que tamién hebo una xuba curiosa d'estes ayudes.

D'otra manera la convocatoria adelántase a primeros d'añu n'atención a la demanda de munchos centros asturianos que tenién qu'andar adelantando perres, o hasta empufándose en créditos mientres esperaben poles ayudes del Principáu. La convocatoria tamién enancha'l plazu de solicitú y fai más cenciellu'l procesu alministrativu pa tramitales. El destín d'estes ayudes ye mayoritariamente'l financiar meyores

nes instalaciones de los centros asturianos y les sos actividaes culturales.

Otra novedá de la convocatoria ye que por primera vez les subvenciones a los centros contemplen l'ayuda a actividaes de promoción d'Asturies que desarrollen los mesmos centros, potenciando'l so calter d'embaxadores d'Asturies nel mundu. García Valledor remembró la esistencia d'otres trés llínies d'ayuda a la emigración, una de calter socio-asistencial, otra para facer cursos d'asturianu y otra propia pa la Federación Internacional de Centros Asturianos, anque la financiación d'estes trés llinies ta pendiente de que s'aprebe estos meses el II Plan d'Emigración.