Xuan Santori afonda na evolución del estandar del asturianu al traviés de la lliteratura

El filólogu Xuan Santori fai nel llibru "milenta voces" (Trabe) un repás de la construcción del estándar normativu del asturianu al traviés de les voces más importantes de la lliteratura asturiana del Surdimientu.

Filólogu na Oficina de Política Llingüística de la Conseyería de Cultura, Xuan Santori (Uviéu, 1968) investiga nesta obra, a partir d'un trabayu de campu encontáu n'entrevistes a los escritores que protagonizaron y protagonicen el Surdimientu y a los sos llectores la manera d'escribir l'asturianu, analizando qué variantes son les más usaes, si se busca una llingua artificial o se quier acercar lo más posible a como fala la xente de la cai.

Na presentación del llibru coméntase como la construcción d'un estándar normativu tien dos dimensiones: la fixación o dá-y a la llingua unes normes de referencia penriba de les variantes dialectales y de fala, y que correspuende a les autoridaes llingüístiques. D'otru llau, tiense en cuenta la cultivación o arriquecimientu de la llingua como instrumentu valible pa tolos usos posibles, sobremanera los lliterarios. Ye precisamente nesti últimu campu nel que se centra l'oxetivu d'esti trabayu: comprobar el papel decisivu que la creación poética del Surdimientu tuvo na modulación, desenrollu y afitamientu del estándar asturianu y na recuperación social del idioma.