Xosé Anxelu Gutiérrez lleva’l so segundu Premiu Xuan María Acebal con ‘Les hores de lluz’

Ganador na edición del 2011 con ‘Un ciertu desorde’, l’avilesín Xosé Anxelu Gutiérrez Morán ye merecedor del so segundu Premiu Xuan María Acebal col poemariu ‘Les hores de lluz’. La estaya de poesía de los Premios Lliterarios foi la qu’algamó más participación esti añu.

El vienres fíxose públicu’l fallu del xuráu del XXIX Premiu Xuan María Acebal de poesía, qu’aconceyara na tarde del miércoles. Ésti tuvo conformáu por Rodrigo Olay, Iris Quintana y Marta Mori, ganadora de la edición pasada con ‘Los carreros del tiempu’, con Antón García, direutor xeneral de Política Llingüística, como presidente, y Lourdes Álvarez, filóloga de la direición xeneral, como secretaria.

L’acta rescampla de ‘Les hores de lluz’, una coleición de poemes unitaria y equilibrada, “la riqueza formal del poemariu nel que les composiciones tienden a una consiguida y evocadora brevedá, que toma dende la suxestiva síntesis del haiku a pieces de ritmu más abiertu, igualmente concises, siguiendo l'ideal de naturaleza espresiva y difícil facilidá defendida polos clásicos”. D’igual forma apunta que ye “un llibru intensu, de voz precisa, que vuelve la mirada sobre la meyor tradición poética del Surdimentu, cola que dialoga abiertamente, llogrando da-y un timbre nuevu, personal y inconfundible”.

El Xuan María Acebal, que tien una recompensa de 6.000 euros y la espublización del poemariu, foi’l Premiu Lliterariu que contó con mayor participación de los ocho convocaos, con 15 trabayos presentaos, siguíu pol XVI Premiu María Josefa Canellada de lliteratura infantil y xuvenil, con 13. El xuráu fixo referencia qu’éstos tuvieron un altu nivel.

Tamién un Teodoro Cuesta

Nacíu nel 1969 n’Avilés, Gutiérrez Morán ye doctor en Bioloxía pola Universidá d'Uviéu y investigador del Centru Oceanográficu de Xixón. Amás del so llabor profesional, con más de 120 artículos espublizaos en revistes científiques internacional, tien una destacada creación lliteraria, con collaboraciones en diferentes espublizaciones y poemarios como ‘Un ciertu desorde’, ganador del XVII Premiu Xuan María Acebal, o ‘Diversa memoria’, col que llevó nel 2008 el XVIII Premiu de Poesía Teodoro Cuesta de poesía qu’entama’l Conceyu de Mieres.