Xixón va acoyer un ciclu de charres científiques n'asturianu

El Centru Cultural "Antiguu Institutu" de Xixón va acoyer dende'l próximu martes 22 el ciclu de conferencies n'asturianu "l'asturianu sí tien ciencia", organizáu con motivu de la declaración del añu de la Ciencia n'España, una celebración que quier averar los descubrimientos y llabor de los científicos de toles rames del saber al públicu xeneral.

Ello ye que'l ciclu de conferencies que se presenta va ser el primeru de divulgación científica de les sos característiques que se faiga n'asturianu.

Cuatro conferenciantes van ser los encargaos de poner les charres, qu'entamen el martes 22 cola participación del llingüista Xulio Viejo, que va falar de "La Ciencia Llingüística y el mitu de la llingua". El miércoles 23, el profesor del Departamentu d'Informática de la Universidá d'Uviéu y collaborador d'Asturies.com Xabiel G. Pañeda va tratar de "redes de distribución peer to peer". El ciclu sigue'l xueves 24 con Xosé M. Fernández, del Institutu Européu de bioinformática, que va poner la charra "Xenómica: desenduvellando'l filangrayu de la vida" y remata'l vienres 25 cola participación de Xosé Ánxelu G. Morán, del Institutu Oceanográficu Español, que va falar de "La mar de Bichos, una introducción a la ecoloxía acuática microbiana". Toles charres van ser a les 19:30h.