Xixón sigue ensin ordenances del asturianu

Mientres el plan autonómicu de Normalización del asturianu ta acabante de pasar otra selmana ensin asomase pel Conseyu de Gobiernu, les ordenances d'usu del asturianu na mayor ciudá del país apigacen ensin llegar a plenu. Naide sabe nada en Xixón sobre la posible fecha d'aprobación de les mesmes.

Los retrasos colos que se mueven tolos asuntos rellacionaos cola política de normalización del asturianu n'alministración autonómica lleguen tamién a Xixón. La ciudá cuenta dende'l 20 de xineru del 2004 con una oficina de normalización, organismu que s'estrenó con un actu inaugural al qu'asistió incluso l'alcaldesa de la ciudá Paz Fernández Felgueroso, que declaró testualmente que "tola corporación celebraba la creación de la oficina". L'organismu dependiente de la Conceyalía d'educación que lleva Carmen Rúa plantegóse nel momentu de la so constitución la redacción d'unes ordenances d'usu del asturianu nel conceyu como ún de los oxetivos de trabayu nel 2004. El testu de les ordenances tuvo preparáu pa mediaos de setiembre, momentu en que se presentó a tolos grupos políticos con representación na casa conceyu (PSOE, PP y IX).

Anque yá na mesma presentación de la oficina la conceyala delegada Carmen Rua esplicó que diba ser preciso esperar a un momentu de tranquilidá na vida política del conceyu, que d'aquella andaba revuelta pola aprobación del Plan d'ordenación Urbana y otros asuntos polémicos, pa llevar les ordenances a plenu, lo cierto ye que a mediaos de febreru de 2005, más d'un añu dempués d'echar a andar la oficina y cinco meses dempués de dase a conocer les ordenances a los grupos políticos, sigue ensin sabese nada sobre los plazos pa la so aprobación. La responsable de la oficina de la llingua, María Xosé Rodríguez, declaró a Asturies.com que la parte que-y correspondía al so departamentu nel tema de les ordenances "yá ta fecha" y que l'asuntu "ya nun depende de la oficina". Pela so parte, dende la oficina de la conceyala d'educación señalose a la llamada d'Asturies.com que "la conceyala nun tenia declaraciones que facer sobre'l tema".

El Conseyu Asesor de la oficina de la llingua aconceya'l día 2 de marzu, fecha en que podríen dase novedaes sobre estes ordenances. María Xosé Rodríguez apunta a la importancia de que s'aprebe'l plan de Normalización del Principáu "pa quitar rocees nos conceyos"