Xixón celebra’l Salón del Llibru Asturianu

Esti vienres 24 d’agostu entama en Xixón el Salón del Llibru Asturianu, que llega con ésta a la so quinta edición. L’eventu, que va desarrrollase na cai Francisco Tomás y Valiente, ye una iniciativa del Gremiu d’Editores d’Asturies, y va enseñar les producciones de cerca de quince sellos distintos. Amás de la esposición y venta de llibros, la feria va contar con presentaciones d’obres nueves y firmes de llibros y tamién con actividaes pa que los rapacinos se metan pela llectura. El Salón del Llibru Asturianu va poder visitalu’l públicu hasta’l 2 de setiembre n’horariu de llunes a vienres, d’11:00 a 14:00 hores y de 17:00 a 21:00 hores, y los sábados y domingos, d’11:30 a 14:30 hores y de 16:30 a 21.30 hores.