Xixón Sí Puede convoca a los xixoneses pa que decidan la so postura nel Plenu d'investidura

Presentar a Mario Suárez del Fueyo como alcalde o apoyar al socialista José María Pérez. Éses son les dos opciones que Xixón Sí Puede plantega esti xueves a tolos ciudadanos del conceyu.

A lo llargo de tola xornada de güei, hasta les 20 hores, tán a disposición de la población urnes na sede de Podemos na cai Mieres y nos centros municipales d'El Llano, Pumarín, Atenéu de La Calzada y El Coto, amás de nel Antiguu Instituto y nel llocal de l'Asociación de Vecinos de Vega-La Camocha, pa que decida qué postura han d'adoptar nel Plenu del sábadu los seis conceyales eleutos de Xixón Sí Puede. Los requisitos son tar empadronáu nel conceyu y acudir col DNI.

Nel casu de que la decisión sía presentar a Suárez del Fueyo, Xixón Sí Puede necesitaría los votos del PSOE y IX pa que la so candidatura salga alantre, lo que na práutica sería dar l'alcaldía a Foro, mentes que nel segundu casu, la candidatura de xunidá popular va imponer a los socialistes una serie de puntos ente los que s'inclúi un tope salarial de 1.900 euros, la dimisión de cualquier conceyal si ye imputáu por corrupción, un PXO al serviciu de la ciudadanía o'l refugu a la incineradora, ente otros. Nin PSOE nin IX mostraron la so conformidá cola opción tomada por Xixón Sí Puede pa decidir la so postura pal Plenu del sábadu.

Otra manera, dada la importancia de la decisión, ayeri diéronse a conocer trés manifiestos nos que se solicita un gobiernu municipal d'izquierdes en Xixón. A estos documentos, llanzaos por delles plataformes ciudadanes y con firmes como les de Francisco Javier García Valledor o Cándido González Carnero, sumóse una asamblea convocada d'urxencia nel salón d'actos del Antiguu Institutu, con xente fuera de la mesma, na que s'amosó la disconformidá de los presentes cola posibilidá de dar l'alcaldía a Foro. Xabel Vegas actúo como moderador y nella intervinieron dende la mesa Chus Pedro y Ana García, ente otros.