Xixón normaliza l'asturianu nos sos chigres y restoranes

La Oficina Municipal de la Llingua de Xixón presentó ayeri una nueva campaña de normalización social del asturianu empobinada específicamente a la hostelería. Col nome de "Equí tas en casa", la campaña ufierta tolos materiales precisos pa que cada chigre o restorán puea normalizar l'asturianu en tola so rellación colos clientes.

Dende cartelos n'asturianu pa les puertes del local hasta vocabularios, la campaña parte de la base de que ye preciso recuperar l'usu del asturianu y de los nomes asturianos de bien de los platos y especialidaes que se sirven y que tan perdiéndose énte l'avance de formes acastellanaes. El director de la Oficina de Política Llingüística Ramón d'Andrés ironizó sobre esti particular na presentación de la campaña, a la que tamién asistieron los responsables de la Sociedá Mesta de Turismu de Xixón y de l'Asociación Empresarial de Hostelería de Xixón, manifestando como'l pixín taba reculando énte una invasión de rape. El criteriu de que'l visitante de fuera vien buscando na hostelería asturiana un puntu de diferenciación y particularidá, dalgo opuesto al tradicional convencimientu de que l'asturianu'l va confundir al turista, ye l'encontu d'esta campaña que va repartir per chigres y restoranes de Xixón carpetes que con lletreros, vocabularios y un CD con una ferramienta informática desarrollada pola empresa ARAZ na que s'inxerten más de 800 definiciones n'asturianu coles que'l responsable de cada local va poder iguar, peronalizar y imprimir la carta de la casa n'edición billingüe asturianu-castellanu.