Xera viaxa a la República Checa y Alemaña a esparder el so mensaxe

El grupu Xera, ún de les bandes más internacionales de la música asturiana, va actuar esti xueves en Plzeň (República Checa) y el vienres, en Regensburg (Alemaña). En xunetu tornen al país teutón a esparder el so mensaxe.
 
Na población checa de Plzeň, los asturianos van participar nel Mediterránea Festival, certame qu’axunta música, gastronomía y cultura, y que ta centráu de forma especial nel Estáu español y francés. Xera va tocar nel club Divadlo Pod Iampou a les 21 hores. Mentes, el conciertu de Regensbur ta encuadráu nel Festival CinESculture, qu’esti añu dedica una atención especial a Asturies. Asina, amás de Xera, van actuar nesta ciudá alemana’l xixonés DJ Pimp (mañana), Rafa Lorenzo (16 y 17 de xunu) y Skama la Rede (25 de xunu). Esti festival tamién va tener espacios pa la llingua asturiana, la lliteratura del país o’l cine asturiano.
 
Xera, que recién incorporó a los músicos Xuan, Sara y Chus tres la marcha por motivos llaborales d’Aníbal Menchaca y Ana Fernández, va tornar a Alemaña en xunetu, en concreto a Loshausen (día 23) pa tocar nel World Music Festival. Otres actuaciones previstes pa esti añu son la de XV Nueche Celta de Granda (31 de xunetu), el XVI Folk Plasencia (19 d’agostu) y el XVII Les Traversées Tatihou (29 d’agostu), en Normaundie, onde tamién va tar presente’l gallegu Carlos Núñez.
 
D’esta forma, la banda asturiana continúa tocando per toda Europa espardiendo la so música y el so mensaxe, dalgo pa lo que-yos ta resultando perimportante l’apostar pola llicencia Creative Commons. “Si non fora por esa llicencia y les ventayes que trae pa con sí, nunca llegaríamos a tocar na República Checa”, aseguren los miembros del grupu.