Xeira denuncia les males condiciones del enseñu del gallego-asturianu

Con motivu de la celebración la selmana pasada del Día de les Lletres Asturianes nel Navia-Eo, con un actu nel que s'axuntaron en A Veiga los escolinos qu'estudien gallego-asturianu, l'asociación de defensa de la Fala Xeira denunció'l tonu optimista de les declaraciones institucionales que se fixeron esi día.

En concreto, Xeira diz que les afirmaciones de los responsables de la Conseyería d'Educación son trunfalistes, en cuantes que nun pue falase, como se fexo, d'una xuba de matriculación n'asignatura. Pa Xeira l'asignatura "sigue dándose nos mesmos centros qu'hai muitos anos y el sou númaro nun medra" denunciando qu'amás hai centros "unde se deixóu de dar como en Xarrio, Valdepares, Grandas ou nel CRA Eilao-Sarceda" centru esti últimu onde Xeira asegura que l'alministración nun cubrió la plaza ello con haber abondos alumnos matriculaos. Les quexes sobre educación de Xeira lleguen a Luiña (Ibias) onde Xeira asegura que nun se cubrió la plaza de Gallego-asturianu y que lleven dos años impartiéndose clas d'asturianu en cuenta d'ello col preste de l'alministración autonómica.

Xeira denuncia igualmente la desapaición de l'asignatura en dellos centros de Primaria onde yá se ponía por causa de la precariedá llegal de la plaza de mayestru nesta asignatura, dalgo que, amestao al fechu de que se convocaren munches "medies places" con itinerancies y a la falta de docentes na especialidá llevó a que munchos centros perdieren interés na esperiencia. Pa Xeira ye esmolecedor que nun se dea l'asignatura nes escueles de Xarrio, A Veiga, Grandas, Bual, Castripol o Os Ozcos. Por too ello, Xeira esíxe-y al Conseyeru d'Educación Iglesias Riopedre que cumpla col so compromisu públicu que fixere va agora yá siete años, de la que garró'l cargu, de llevar l'asignatura de gallego-asturianu a tolos centros educativos del Navia-Eo.