XEGA da-y el lladriyu rosa al director del Atenéu de La Calzada

La organización asturiana de defensa del colectivu gai y lésbicu XEGA dio anuncia ayeri de los actos colos que va celebrar el Día Internacional del Arguyu Gai, que va celebrase esti 28 de xunu baxo'l llema "pola diversidá, toles families importen" col que pretende trescalar dende la igualación de derechos afondando "nel reconocimientu al colectivu de gais, llesbianes, bisexuales y tresexuales".

Parte d'estes celebraciones son la entrega del premiu "lladriyu rosa" col que Xega reconoz a la persona que más dañu fexo al colectivu GLBT y que foi pal director del Atenéu de La Calzada de Xixón Avelino Alonso, que fexo declaraciones públiques nun diariu asturianu contra'l derechu de les persones del mesmu sexu a contraer matrimoniu. Na parte positiva, el premiu "triángulu rosa" a la persona o colectivu que más fexo al favor del colectivu GLBT, foi pa un conxuntu d'institutos de secundaria de toa Asturies, ente ellos el "Juan de Villanueva" de Siero, l'IES de Pravia, el "Clarín" d'Uviéu, el Feijoo de Xixón y l'IES de Navia polos talleres d'educación afectivo-sexual qu'imparten. Xega, que diz qu'hebo bien de candidatos a esti premiu, quier reconocer col distingu'l compromisu d'estos centros pol respetu a la igualdá y la diversidá.

Amás d'estos premios, los actos de celebración incluyíen la convocatoria del Concursu de Rellatos 28 de Xunu, nel que resultó ganadora l'autora Ada Alonso col escritu "De vidrio ciego" y el valencianu Oswaldo Martín pol rellatu "La peor tortura posible". Nel certame de carteles, la ganadora foi la diseñadora uvieina Emma Blanco.