La XDLA alerta sobre impedimentos pa estudiar Llingua Asturiana en Bachilleratu

Un añu más, gran parte de los alumnos que quieren continuar recibiendo clases de Llingua Asturiana y Gallego-asturiano nel Bachilleratu atopen torgues pa ello. Son numberoses les quexes que lleguen a la XDLA énte la pasividá de la Conseyería d’Educación, Cultura y Deporte.

“Como yá ye vezu nos principios de cursu n'Asturies, l'incumplimientu de les lleis, los recortes y la privación del derechu a estudiar asturianu al alumnáu que lo solicita vuelven a marcar l'axenda nun sistema educativu que mantién en situación de marxinación y marxinalidá a la llingua asturiana”, apunten dende la Xunta pola Defensa de la Llingua Asturiana (XDLA), que centra les sos quexes, pese a ser estensibles a toles etapes, nel Bachilleratu, onde la situación ye “más llaceriosa”, yá que’l porcentaxe del alumnáu “que ye quién a facer valir los sos derechos y poder dar l'asignatura ye casi inesistente (poco más de 200 d'ente 10.000)”. “Esta situación dexa bien claro la nula intención de la conseyería d'aplicar l'espíritu de la Llei d'Usu. Resulta demoledor viniendo d'un equipu saliente que, nin siquiera nel principiu del so últimu cursu, tien el más mínimu xestu conciliador y positivu pa colos derechos de les persones que soliciten estudiar asturianu”, añaden.

Según afirmen dende la organización cívica, llegaron-y quexes d’alumnos, centros y asociaciones de padres de dellos puntos d’Asturies, como Samartín del Rei Aurelio, Xixón o Mieres, “ensin qu'hasta la fecha la conseyería demostrara tar faciendo dalgo pa iguar esta situación”. Por esti motivu, la XDLA reclama a Educación “que tome les midíes necesaries pal cumplimientu de la llei y p'asegurar el derechu del alumnáu a recibir formación n'asturianu en tolos centros educativos y en tolos niveles”.