Wikipedia n'asturianu ameyoró la correición llingüística d'artículos clasificaos de referencia

|
Usuarios Wikipedia n'asturianu na ALLA

La xornada d'edición celebróse na biblioteca de l'Academia de la Llingua Asturiana (ALLA) coincidiendo col Día Européu de les Llingües.

Usuarios de la comunidá de Wikipedia n'asturianu con amplia esperiencia trabayó na tarde d'ayeri per trés hores nel ameyoramientu de la calidá y la correición llingüística d'artículos inxeríos na categoría de 1.000 artículos indispensables de la enciclopedia llibre. Una cita p'acuriosar conteníos que busca dar visibilidá al asturianu, llingua que rescampla ente’l conxuntu de proyeutos wikipedistes a nivel mundial y européu, ente otres cuestiones, por acabar cola fienda de xéneru nes biografíes d’homes y muyeres, siendo una de les primeres n’algamar la paridá.

Con más 130.000 artículos, el nuesu idioma allúgase puestu nel 63 de les más de 300 con representación na enciclopedia plurillingüe. Per delantre na clasificación, a 4.000 artículos, tien al galés, y per detrás na tabla, mui cerca, al macedoniu.

A diferencia de la 'editatón' celebrada nel mesmu llugar en payares, ésta tuvo zarrada a usuarios con esperiencia previa, tratando d'afitar los nexos cola ALLA como entidá cimera na regulación y normativización del asturianu. Naquella ocasión centróse en deprender el funcionamientu de Wikipedia a usuarios nuevos, creando y ameyorando dellos artículos.

Na semeya, un momentu de la xunta d'ayeri.

Contador Estadistiques