L’ALLA va presentar una web nueva nel marcu de les XXXIII Xornaes Internacionales d’Estudiu

|

El salón d’actos de la Facultá de Filosofía y Lletres de la Universidá d’Uviéu va acoyer les XXXIII Xornaes Intenacionales d’Estudiu de l’Academia de la Llingua Asturiana (ALLA) del 4 al 6 de payares. La institución académica va aprovechar l’eventu pa presentar una web nueva.

Precisamente, la estrena del portal nuevu de l’ALLA na rede va abrir les xornaes xunto cola presentación de la edición dixital del númberu 111 de ‘Lletres asturianes’ y del 4 de ‘Ciencies. Cartafueyos Asturianos de Ciencia y Teunoloxía’. Va ser el martes próximu al meudía, a lo que va siguir la ponencia ‘História da língua: elaboração e estandardização. Alguns parâmetros para a análise destes processos nas Astúrias’ de Clarinda de Azavedo, de la Universidade de Coinmbra. Yá de tarde, l’actividá va reanudase a les 16 hores coles conferencies de Enrique del Teso, de la Universidá d’Uviéu, de nome ‘L’amestáu urbanu. Cuestiones de normativa y llingua escrita’, y d’Elena E. Rodríguez Díaz, de la Universidad de Huelva, con ‘El proceso de imposición de modelos lingüísticos en la Edad Moderna: el caso del patronímico Díez/Díaz en Sayambre’, pa depués entamar un alderique.

Tres una posa, a les 18 hores van tener llugar les charres ‘El Regnum Asturorum y los reinos hispanos mencionados en L’Abreujamens de las historias (c. 1323) y el Compendium Historiarum (c. 1320) de Paolino de Venecia’, a cargu d’Alexander Ibarz, de la University of Reading, y ‘El neutro de materia na morfoloxía nominal del asturianu del conceyu de Ḷḷena’, por Rosabel San Segundo, de la Universidade de Lisboa. Darréu d’un alderique y una posa nueva, va zarrar esta primer xornada, a les 19.45 hores, la presentación por parte del Grupu AMPER-Astur, de la Universidá d’Uviéu, del ‘Atles de los modelos entonativos d’Asturies’.

Actividaes vespertines

L’actividá’l restu de díes va tener llugar peles tardes, con aniciu de les intervenciones a les 16 hores. Cuatro comunicaciones van abrir la xornada del miércoles, protagonizaes por Xosé Ramón Iglesias (‘Les primeres obres de Pepín de Pría’), Pablo Rodríguez Medina (‘Incidencia del mediu, condicionamientu y estratexes lliteraries en ‘El cuadernu de rayes’ de Miguel Allende’), Inaciu Galán (‘Adautación del enseñu d’asturianu al Marcu común européu de referencia pa llingües’) y Vicente García Oliva (‘Vides paraleles –que converxen nun puntu– de Don Xuan Junquera Huergo y Don Xosé Napoleón Acebal’). Tres l’habitual alderique y una posa, va desendolcase, a les 17.15 hores, la ponencia ‘‘Cuando examen les abeyes’: Primer testu lliterariu n’asturianu  y la so importancia na historia de la lliteratura’, de José Miguel Lamalfa, de la Universidá d’Uviéu, mentes qu’a les 18.30 hores el turnu va ser pa Ramiro González Delgado, de la Universidad de Extremadura, cola charra ‘Tradición clásica nel teatru en llingua asturiana’. Jesús Suárez López, del Muséu del Pueblu d’Asturies, va zarrar el día a les 19.30 hores cola presentación del ‘Atles Sonoru de la Llingua Asturiana’.

Ocho comunicaciones van preceder a dos ponencies na xornada cabera d’esta iniciativa de l’ALLA que yá cumple trenta y trés ediciones. Asina, a les 16 hores va tomar la pallabra Clara Elena Prieto con ‘¿Cómo ye, ho? Usos y valores de la interxeición ho nel asturianu actual’, pa depués continuar, con alderiques y posa cada cuatro intervenciones, Pablo Suárez García, con ‘L’arte la guerra. Sobre’l léxicu bélicu na nuesa llingua’; José Antonio Méndez Sanz, Adolfo García Martínez y José Ángel Gayol, con ‘Asturies incorporada: averamientu a les espresiones-mundu nel ámbitu asturianu’; Alberto Gómez Bautista, con ‘Algunas notas sobre la formación de palabras en mirandés’; Manuel de Abol-Brason, con ‘La nación de Asturias: realidad histórica frente a manipulación’; Xulio Llaneza, con ‘Llamar por teléfonu-Llamar pel teléfonu’; Xuan Xosé Lajo, con ‘Los posesivos en Senabria: variantes y sintaxis’; y Loreto Díaz Suárez, con ‘L’asturianu y les llingües de la Península Ibérica: taxonomía y denominación nos llibros de testu’. Por último, a les 18.45 hores, van intervenir Margarita Fernández Mier, de la Universidá de Lleón, y David González Álvarez, Universidad Complutense, cola conferencia ‘Una arqueoloxía pal paisaxe rural asturianu’, y, darréu, Coloma Lleal, de Universitat de Barcelona, con ‘Ideología lingüística y lexicografía’, que va servir de pieslle.

Matrícula abierta hasta’l viernes

Les persones interesaes en matriculase p’algamar el certificáu acreditativu d’asistencia a les XXXIII Xornaes Internacionales d’Estudiu pueden facelo hasta'l 31 d'ochobre, vienres, na sede de la institución académica, asitiada na uviedina cai L’Águila númberu 10, nel teléfonu 985.21.18.37 o nel corréu electrónicu alla@academiadelallingua.com.

Contador Estadistiques