Volotea, aerollinia de baxu coste, xune Asturies con Eivissa y Málaga

L’Aeropuertu d’Asturies va tar coneutáu dende xunu con Eivissa y Málaga gracies a l’aterrizaxe nel país de l’aerollinia de baxu coste Volotea. Ésta especialízase en xunir ciudaes medianes y pequeñes d’Europa con conexones direutes.
 
Nel casu del nuesu país, de momento va tener vuelos dientro del Estáu, en concreto a Illes Balears y Andalucía, que van principiar el 15 de xunu con trés vuelos selmanales direutos a cada destín. Éstos tienen, como promoción, un preciu de 29 euros por trayeutu, tases incluyíes. D’esta forma, Asturies conviértese nún de los 15 destinos del Estáu a los que vuela Volotea, una compañía que se vende como una aerollinia pensada pa coneutar, per mediu de vuelos directos a precios mui competitivos, ciudaes pequeñes y medianes del continente européu ensin necesidá de pasar por un hub.
 
Les salides pa Eivissa tán previstes los llunes a les 12.15 hores, y los miércoles y vienres a les 12.35 hores. Los trayeutos de vuelta van salir dende l'aeropuertu d'Eivissa-San José los llunes a les 6.10 hores y los miércoles y vienres a les 6.30 hores. Mentes, los vuelos a Málaga van despegar los llunes a les 8.20 hores y los miércoles y vienres a les 8.40 hores. En direición Asturies, los aviones saldrán los llunes a les 10.15 hores y los miércoles y vienres a les 10.35 hores.