Entréguense los gallardones del VIII Concursu de Micro-rellatos n’Asturianu L’Horru del Carbayedo

Inaciu Galán resultó ganador del VIII Concursu de Micro-rellatos n’Asturianu L’Horru del Carbayedo, qu’esti llunes celebra la entrega de premios dientro del programa festivu del barriu avilesín, col testu '8:43'. La segunda posición foi pa Luis Manuel Suárez con 'Soledá de luxe'.

El xuráu del gallardón, que convoca l’Asociación de Vecinos El Hórreo, tuvo formáu por Miguel Solís, Arancha Prado y Hugo Cortina, actuando como secretaria –ensin derechu a votu– la responsable de la oficina de normalización llingüística de la ciudá, Montserrat Machicado. Tres la llecturar de los testos presentaos, decidieron dar el primer premiu del concursu al que llevaba’l nome de ‘8:43’, escritu pol xixonés Galán baxo’l nomatu de ‘Xuan Miyar’, mentes que’l segundu premiu cayó na obra ‘Soledá de luxe’, del avilesín Suárez, bien conocíu por formar parte del dúu Mestura, que se presentó como ‘Lot’. El primer premiu tien una recompensa de 400 euros y troféu, mentes que la del segundu ye de 200 euros y placa.

Dambos escritores van recibir los gallardones esta tarde, a les 19.30 hores, nel salón d’actos de la sede vecinal –asitiada na cai Dr Marañón númberu 16–, actu nel que dambos van facer llectura pública de les sos obres. Éstes yá se pudieron lleer a lo llargo de la fin de selmana nel parque del Carbayedo, xunto con tolos trabayos que concursaron, nuna esposición con motivu de les fiestes de San Roque que se celebren nesti puntu d’Avilés y que finen güei. Hai que destacar que previamente a la entrega de premios, en concreto a les 18 hores, los presentes van poder disfrutar de la representación de ‘De filandón’, a cargu del grupu de teatru asturianu Garrapiellu. La folixa va finar con un conciertu d’Anabel Santiagu nel parque (20.30 hores), una verbena cola orquesta Élite y un monólogu d’El Maestru.