Vienden pueblu en Parres

La cadena de noticies BBC recueye güei la noticia de la venta n'Escocia, por un preciu de salida d'un millón de llibres, de Fort Augustus Abbey, monesteriu del sieglu XVIII xunta'l famosu Llagu Ness. La noticia tien el so aquello porque l'históricu edificiu que poblaren los monxos benedictinos viéndelu un presentador de la tv y porque la xente del pueblu intentó facer una ufierta pol edificiu que nun se tuvo en cuenta.

Mientres estes coses tan pasando allálantrones, n'Asturies l'axencia n'internet Joyas Inmobiliarias, especializada en edificios históricos y palacios de toa triba, tien pa vender ná menos qu'un pueblu enteru en conceyu Parres. El conxuntu en cuestión consta de cinco cases (ente elles una casona de más de 400m2) y tres horros, amás de cuadres y güertes que faen sobre una hectaria de terrén. El preciu, muncho más modestu que'l del monesteriu, ye de 570.000 euros.... Pa quien pueda ponelos.