Victoria clara d’un Uviéu superior nun campu que da pena

L'Uviéu supo xugar escontra'l rival y el campu. L'equipu azul adautóse dafechamente al mal estáu del terrenu xuegu y foi mui superior al Navarro. Entamó'l partíu cola ocasión más clara de les que tendría l'equipu avilesín en tol partíu, pero l'Uviéu recuperó'l pelotu y na contra Darío marcaba´l so gol númberu 17. Rivas volvió a facer un claru apueste ofensivu con muncha presión, fútbol mui direutu y buscando les entraes per banda de Xandru y Yeray que llevaron siempre peligru pa la puerta de Rubén qu'ayeri tuvo siempre mui atentu y fizo un bon partíu. L'Uviéu siempre buscó l'ataque pela vía rápida con un fútbol mui direutu, pero´l Navarro nunca nun s'entregó y dio la cara en tou momentu, xugando con una llinia defensiva enforma adelantada que xunto cola bona circulación de balón del equipu uvieín dieron llugar a munches ocasiones de gol. Asina, nel min. 24 Yeray entró pela banda y mandó de primeres un midíu pase al que Cervero-y dio rempuesta de gol con un acrobáticu remate, 2-0 y más de lo mesmo hasta'l descansu.

Na segunda metá, Rivas permitió-y un merecíu descansu al pichichi Darío y entró nel campu un motiváu Aldeondo. Les ganes del delanteru navarru viéronse na primer xugada d'esti actu qu'acabó nel tercer gol del Uviéu y segundu de Cervero, el partíu taba decidíu. L'Uviéu tomóse'l restu del partíu con calma, acabaron les entraes per banda y la responsabilidá atacante azul cayó na figura d'Aldeondo que bien mereció'l gol en delles llegaes solu contra´l porteru pero que nun foi a marcar. El Navarro dio una bona imaxe, pero´l so peligru llimitóse solo a dellos tiros dende fora l'area que nunca nun consiguieron el so oxetivu.

En definitiva, victoria clara del Uviéu que lu confirma como líder de la categoría y pon a les clares el bon momentu pel que pasen Darío y Cervero. Medra la diferencia del líder nuna categoría onde'l Mosconia nun pudo xugar el so partíu por culpa la ñeve, el Ribeseya se reafirma como candidatu a la liguilla y el Llangréu céde-y plaza al Universidá pola mor de la derrota de los de la cuenca n'Avilés y la victoria de los estudiantiles sobre´l A.C.F.