Ventiún candidatures opten al premiu al Pueblu Exemplar

Ventiún candidatures opten al Premiu al Pueblu Exemplar qu'anualmente otorga la Fundación Príncipe d'Asturies. El xuráu va dar a conocer el fallu a les 18 hores de güei, llunes, día 17, según informó la institución al traviés d'una nota de prensa.

El Premiu al Pueblu Exemplar d'Asturies ta destináu al "pueblu, aldea, núcleu de población o grupu humanu del Principáu que destacara de mou notable na defensa y conservación del so entornu natural o ecolóxicu, del so patrimoniu históricu, cultural o artísticu, na realización d'obres comunales u otres manifestaciones de solidaridá estraordinaria".

Esti galardón convocóse per primer vegada en 1990, al cumplise'l décimu aniversariu de la Fundación, y tien una naturaleza y calter diferentes a los Premios Príncipe d'Asturies. L'añu pasáu concedióse a la comunidá vecinal de Sariego.

Nesta edición opten al galardón, qu'habitualmente entrega'l Príncipe d'Asturies, el conceyu de Noreña, la población de Bustiel.lu d'Ayones (Valdés), Coballes (Casu), l'Asociación d'Amigos de Cuideiru, l'Asociación Fraternidá y Fundación Edes pa la Educación Especial (Tapia), Valdesoto (Siero), la parroquia de Ciañu y L'Agüeria Samuño (Llangreú), Llugones (Siero), la Sociedá Humanitarios de Samartín y pueblu de Morea (Ayer), Insierto (Mieres), Comunidá Vecinal de Sobrescobiu, Valdréu (Cuideiru), Torazu (Cabranes) les parroquies de Pel.luno (Ayer), Cabueñes (Xixón) y La Riba (Llaviana), Ortigueira (Cuaña) y Carcéu (Valdés).

También tán nominaes la parroquia de Viodo-Cabu Peñes (Gozón), San Salvador (Allande) y la parroquia de Rubianu (Grau).

A lo llargo de les sos ediciones, esti galardón -que cuenta con un Xuráu propiu- recayó tanto en grupos de población como n'asociaciones y colectivos humanos. La relación de premiaos entamó cola aldea de Cuñaba.