Venti años de la catástrofe de Bophal

Güei celébrase nel mundu la Xornada Contra los Plaguicides, una división de la industria químico que mueve una cantidá ablayante de millones pero que, al decir de munchos estudios, supón una amenaza pa la salú y el mediu ambiente.

La instauración d'esti día mundial de los plaguicides celebra'l cabudañu del desastre del 3 d'avientu de 1984, cuando la fábrica de
plaguicides de la empresa Union Carbide en Bhopal (India) soltó a
l'atmósfera 40 tonelaaes de productos químicos que mataron a
20.000 persones no que foi el peor accidente industrial de la historia.
La investigación de la xusticia indio descubrió tres años
depués que'l desastre nun fuere un accidente, y que'l responsable de la traxedia fuere'l
director de la compañía, que retirare los sistemes de seguranza. Sicasí, la xusticia de la India nunca nun pudo procesar a Anderson, que vive anguaño nos EEUU, estáu que nun concedió la estradición d'Anderson. La culpa de la traxedia quedó güérfana al mercar nel 2001 la planta de Bophal la compañía Dow Chemical, que nunca nun quixo aceptar responsabilidá polo que pasare

Les cifres oficiales falen de 2.500
muertos la nueche del desatre y d'ocho mil muertos más n'aquella selmana, contándose en total unes 20.000 v´ctimes mortales y
ente 120.000 y 150.000 enfermos crónicos por culpa del escape tósicu. Unin Carbide indemnizó al Estáu Indiu con 470 millones de dólares, una paga pequeña en comparanza colos 5.000 millones de dólares que recibieron los EEUU pola marea prieto del Exxon Valdez.

Grupos ecoloxistes asturianos quieren amestase al triste cabudañu, y tamién rescamplar la esistencia n'Asturies d'una presencia importante de la industria químico, con plantes como la Du pont onde se guarden componentes d'alta tosicidá y hasta delles instalaciones de la mesma Union Carbide. La Coordinadora Ecoloxista d'Asturies emitió nesti sentíu un comunicáu nel que pide qu'el Gobiernu asturianu desarrolle los servicios d'inspección ambiental de tolos procesos industriales de la industria químico, que ven que nun se controlen bien, y llaméntense de la falta de personal especializao que puea comprobar el cumplimientu de les normes ambientales