Valledor reconoz la "paralización consciente y deliberada" del plan de normalización llingüística

El conseyeru de Xusticia, Seguridá y Rellaciones Esteriores, Francisco Javier García Valledor, dio ayeri una entrevista a la emisora de radio SER Xixón na qu'afirmó qu'IX-BA sigue nel gobiernu anque tien d'aguantar "muncha agua ferviendo" que-y echen perriba los sos socialistes de gobiernu.

El dirixente d'IX punxo'l casu del nomamientu de María Antonia Fernández Felgueroso como la procuradora xeneral d'Asturies como ún d'esos calderaos d'agua ferviendo, pero aseguró que lo que yá nun tan dimpuestos a consentir n'IX-BA diba ser que la FSA pautare la reforma del estatutu d'autonomía d'espaldes a ellos. Con too y con ello, Valledor alvirtió que la so fuerza política diba pasar pel microscopiu toles actuaciones de la Procuradora.

No tocante a la llingua asturiana, otru de los puntos nos que más rocea hai ente IX-BA y la FSA,Valledor señaló reconoció que ye preciso "superar la paralización consciente y deliberada del plan de normalización llingüística" contradiciendo la valoración en positivo que se fexo nel documentu asoleyáu esta selmana nel que se valoren los trés años de gobiernu conxuntu sobre los avances na normalización del asturianu.

D'otra manera, Valledor nun quixo criticar el fechu de que'l candidatu escoyíu por IX pa dir de cabeza de llista nes elecciones del 2007 vaya ser Jesús Iglesias en cuenta d'elli. Valledor dixo qu'asumía que tar nún partíu ye participar d'un proyectu colectivu y que'l que se prefiriere a Iglesias per delantre d'elli nun-y abultaba sacrificiu personal nengún.