Valledor enfótase n’acabar la llexislatura con pautu

El conseyeru de Xusticia, Seguridá Pública y Rellaciones Esteriores, Francisco Javier García Valledor, declaró ayeri, dempués d'amenazar la selmana pasada cola francedura del Pautu de Gobiernu ente PSOE y IX/BA, que la intención d'Izquierda Xunida ye la de caltener el pautu hasta qu'acabe la llexislatura. El Conseyeru, que participaba na inauguración d'una esposición sobre les corrientes migratories n'España, reclamó qu'Asturies precisa "d'un executivu plural de la izquierda coherente énte les posiciones de la derecha". Valledor enfotóse na igua de delles cuestiones que tien pendientes la so conseyería, casu de l'aprobación de la Llei de Policíes Locales y la negociación del conveniu colectivu de Bomberos d'Asturies.

Tocante a la esposición que s'inauguraba, entitulada "De la España qu'emigra a la España qu'acueye" Valledor sorrayó como Asturies nun dexó de ser tierra d'emigración, sobremanera de xente mozo. La esposición, organizada pola Fundación Largo Caballero, va tar abierta nel Centru de Cultura Antiguu Institutu de Xixón hasta'l próximu 26 d'abril, y nella recuéyense más de 400 documentos, fotos y oxetos d'estremaes époques, lo mesmo de la emigración española, sobremanera gallega y asturiana, como de los inmigrantes que lleguen a España. Bien d'instituciones asturianes collaboren con esta esposición, casu del Archivu d'Indianos de Colombres o los Museos Etnográficos de Xixón y Navia, ente otres.