Valledor afirma que’l pautu de Gobiernu ta “baxo mínimos”

El Conseyeru de Xusticia, Seguridá y Rellaciones Esteriores Javier García Valledor, d'Izquierda Xunida, declaró ayeri nel actu de presentación de la campaña de salvamentu en playes pal branu que'l pautu de gobiernu n'Asturies ente IX-Bloque y la FSA-PSOE alcuéntrase "baxo mínimos" dempués de que PSOE y PP se repartieren los cargos de la procuradoría xeneral d'Asturies ensin contar con la so fuerza política, acusando a socialistes y populares de ser una "rémora pa la rexeneración democrática d'Asturies".

Les declaraciones de Valledor vinieron al rau de l'anuncia que fexerre'l día enantes la diputada d'IX-BA Noemí Martín, que declarare que'l so grupu parlamentariu francía la xuntura de votu cola FSA-PSOE a cuenta de la declaración de la socialista Antonia Felgueroso como Procuradora Xeneral d'Asturies. Valledor reconoció que'l gobiernu asturianu quedaba asina nuna posición "más feble" pa lo que queda de llexislatura pero afitóse na voluntá d'IX-BA de cumplir col pautu de Gobiernu, ello con incurrir la FSA-PSOE nuna decisión "especialmente grave" nel casu de la Procuradoría Xeneral. Al paecer del conseyeru, el repartu de los cargos na institución d e la Procuradoría Xeneral ente PSOE y PP valta l'espíritu de la Llei de creación d'esti organismu, "que preveía una persona independiente al so frente y con llibertá dafechu pa nomar al so axuntu, colo que se pretendía "evitar lo que se ta dando na práctica, que nun ye otro que'l repartu de cuotes y de puestos ente fuerces polítiques". Según Valledor, "los ciudadanos que se sienten representaos pola base social de la izquierda nun puen entender que nun gobiernu de coalición se produza una situación de desllealtá tan manifiesta". Con too y con ello, el conseyeru quixo quitá-y fierru a la posibilidá d'una posible dimisión del so cargu en casu de que la Xunta Xeneral refugare les propuestes d'IX, asegurando que van tentar que toles propuestes que salgan del executivu cuenten col consensu precisu.

El conseyeru faló tamién ayeri de los fondos de cohexón, de los qu'Asturies y Murcia van tener que repartise 1.400 millones d'euros, un repartu que Valledor albidra que va ser malu p'Asturies en cuantes que Murcia cunta cola ventaya del componente poblacional.