Uviéu, Sporting y CD Lealtad van ser los representantes asturianos na Copa

L'Atlético de Lugones viose superáu pol Barbadás (2-1) na fase previa del tornéu y nun va tar el llunes nel sortéu de Las Rozas.

El representante asturianu de preferente, agora primera RFPA, nun algama la clasificación pa la primer ronda de Copa per cuartu añu, los que lleva'l formatu actual de la competición. Una situación que dexa al Uviéu, Sporting y CD Lealtad como únicos representantes nesta edición.

El conxuntu de Llugones contaba cola dificultá de tener que buscar el suañu de recibir a un Primera División en casa na primer ronda nel campu del rival, un Os Carrís con un gran ambiente, y el Barbadás impuso amás un altu ritmu de xuegu que los de Jonathan Sierra acusaron. Dende los primeros compases los gallegos tuvieron ocasiones de gol, anque nun sería hasta'l minutu 40 cuando Isma abrió la llata.

El 2-0 llegaría nel 66, obra de Xinzo al rematar de cabeza un centru dende la derecha. Llegaría darréu la reaición del conxuntu asturianu, nel 74, cuando un defensa gallegu desvío a gol un serviciu llateral qu'atacaba Basualdo, anque'l marcador nun se movería pa desilusión de los xugadores del Llugones y los más de mediu centenar d'aficionaos desplazos a la población ourensana.

Equipos clasificaos

Amás del Barbadás, van tar na primer ronda de Copa, onde-yos esperen rivales de Primera División, el Fuentes (Aragón), el L'Alcora (Comunitat Valenciana), el Velarde (Cantabria), l'Autol (La Rioja), l'Algar (Murcia), el Santa Amalia (Estremaúra), l'históricu Mollerussa (Catalunya), el Rincón (Andalucía) y el Cazalegas (Castilla-La Mancha). El sortéu va ser el llunes a les 12.30 hores na Ciudad del Fútbol de Las Rozas cola presencia del Uviéu y el Sporting, de Segunda División, que van xugar previsiblemente con un Tercera RFEF, y el CD Lealtad, de dicha categoría, qu'enfrentaráse a un Segunda, anque tendría pequeñes posibilidaes de cruciase con un Primera División.

Semeya propiedá de la Real Federación Española de Fútbol (RFEF).