La Comisión d’Economía del Conceyu d’Uviéu aprueba l’usu del asturianu nel tresporte urbanu

Una moción presentada por IX a la Comisión d’Economía y Interior del Conceyu d’Uviéu sobre l’usu del asturianu nel tresporte urbanu salió alantre colos votos de PP y PSOE, y l’astención de Foro. Iniciativa pol Asturianu quexóse n'agostu pola ausencia del idioma tres el cambiu de les llinies.

Tanto nes paraes como na web nueva de Tresportes Uníos d’Asturies (TUA), empresa pública que xestiona los autobuses urbanos, la llingua asturiana nun tenía presencia, al igual que los topónimos tradicionales –tovía non oficiales n’Uviéu–. Por ello, tres la puesta en marcha’l 23 d’agostu de los cambios estableciós pol Plan de Movilidá municipales, Iniciativa pol Asturianu apuntaba que “ye inescusable l’escaezu de la llingua asturiana nesti casu, que presentaba una ocasión mui afayadiza pa incluyila dafechu xunto al castellán, idioma nel que la compañía opera dafechu y n’esclusiva dende’l so entamu, hai más de 30 años”.

Esta quexa treslladóse a los grupos municipales, provocando la reaición d’Izquierda Xunida (IX), que’l 19 de setiembre presentó énte  la Comisión d’Economía y Interior dos propuestes: “que’l Conceyu d’Uviéu, adopte l’alcuerdu d’incorporar l’asturianu, xunto al castellanu, a les llinies de tresporte d’Uviéu” y que “el Conceyu d’Uviéu se comprometa a llevar esta iniciativa al conxuntu de los tresportes d’Asturies (Consorciu de Tresportes d’Asturies)”. Éstes recibieron esta mañana'l vistu bonu de dicha comisión gracies al apoyu del PP y el PSOE, cola astención única de Foro.

Importante pa la visibilización del idioma

Iniciativa pol Asturianu celebra esta decisión y felicita “a los grupos políticos que votaron a favor, y n’especial a IX por presentar la propuesta, por apostar pola normalización del idioma nun ámbitu tan importante pa la visibilización de la llingua asturiana como son los autobuses urbanos, que percuerren la ciudá y el conceyu d’Uviéu tolos díes, pasando per ellos cientos de miles d’usuarios cada añu”. Sicasí, la organización ye consciente de qu’esta decisión “pue quedar en papel moyao, polo que fadremos un siguimientu continuáu de los pasos que se dan, esperando que’l trabayu se lleve alantre nun tiempu razonable”. Por último, anima al equipu de gobiernu d’Agustín Iglesias Caunedo a dar más pasos na normalización del idioma nel conceyu.