Unos Andrés Solar bien especiales

Esti vienres, la Xunta Pola Defensa de la Llingua Asturiana entregó los tradicionales premios Andrés Solar, que vienen dándose dende va yá venti años n'alcordanza del desapaecíu escritor de Xixón y que reconocen a les persones o entidaes que más y que menos ficieron pola llingua asturiana. La entrega del premiu positivu (el pegoyu) a Xosé Sariego Palacio, director del Muséu de la llechería de Morcín y dueñu d'un supermercáu que fai la propaganda n'asturianu, quedó esti añu en segundu planu énte la entrega de la "madreña purpurina" premiu negativu pa la persona o entidá más dañible pal asturianu. Ello ye que Tino Venturo, conceyal de la zona rural de Xixón, vieno a recoyer la madreña purpurina qu'alcordó en da-y la Xunta pola mala restulación de les parroquies del conceyu, rompiendo asina la tradición de los que lleven esti galardón.

Ye la segunda vegada na historia d'estos premios que quien recibe'l madreñazu vien a recoyelu, dende que l'antiguu dirixente del PP Isidro Fernández Rozada lu ganare allá pel añu 93. Al recoyer el premiu Tino Venturo esplicó-y en perfectu castellanu al abondante públicu del salón d'actos del centru del barriu de l'Arena onde se fizo l'actu qu'aceptaba la madreña "con deportividad pero sin propósito de enmienda" y que la madreña "a la que no me considero acreedor, ocupará un lugar privilegiado entre el mobiliario de mi casa" arriendes d'entrar en detalles personales como cuando esplicó queriendo ganase a la xente que "yo soy asturiano, como vosotros, y empecé a trabajar en la mina con catorce años""

Tamién faló Tino Venturo del asuntu pol que ganó'l premiu, la retulación de les parroquies, argumentando en defensa propia que aprosimadamente'l 40% de los topónimos punxéronse "como los dicen allí", especialmente los d'aquellos caminos y llugares que "no tenían nombre hasta ahora porque no estaban rotulados" mientres que se dexaron na forma acastellanada los demás nomes, los más d'ellos de la toponimia mayor y que puen dar llugar a "confusiones" de ponese n'asturianu. El públicu llamentó enforma que dende la mesa los mayestros de ceremonies nun dieren turnu de réplica al célebre conceyal, que tuvo que marchar primero de terminar l'actu.