UNIDÁ diz que l'últimu informe del SADEI "amuesa'l fracasu" de la política económica del PSOE

La formación nacionalista UNIDÁ nun comunicáu afirma que
"ve con preocupación l'últimu informe del
SADEI onde se ve como la renta d'Asturies
depende del tresvase de fondos del restu del Estáu a Asturies per
vía de la Seguridá Social". Pa los responsables de la
coalición "ta claro que'l desinterés, la dexadez, el
clientelismu y la subsidiariedá política pa con Madrid de los
gobernantes asturianos lleváronnos a esti final de vía".

Sigún UNIDÁ "los 1.189 millones d'euros que recibimos de
más en prestaciones frente a les cotizaciones que realizamos, amuesa
como tenemos una economía dependiente y incapaz de rexenerar tola
riqueza perdida na reconversión industrial, minera y
agrícola-ganadera". Pa los nacionalistes "datos como que la
gran mayoría de los conceyos del Caudal, del Nalón y del
Occidente asturianu recibe en pensiones, prexubilaciones y otros subsidios
sociales cantidaes que perpasen el 40 por cientu del conxuntu de les rentes
familiares, nun faen otro que recordar esa ilusión o burbuya del
subsidiu na que vive la economía asturiana, y que fai albidrar un futuru
mui negro nel momentu en que pieslle'l grifu européu y s'acabe'l dineru
de les xubilaciones". Finalmente UNIDÁ denuncia que
"namás les grandes infraestructures alloñaes de les
necesidaes reales del país y orientaes a satisfacer les necesidaes
d'otres zones y la "gallina de oro" del turismu, son les repuestes
d'un gobiernu obsoleto y ensin idees más allá del usu
irresponsable de los nuesos recursos naturales y la solicitú incesante
de más fondos públicos".