UNIDÁ denuncia que l'Hospital del Oriente sigue fuera de la rede pública

Al traviés d'un comunicáu UNIDÁ denuncia que l'Hospital del Oriente continúa fuera de la rede pública sanitaria asturiana. La formación nacionalista acaba d'unviar a los 14 alcaldes de los municipios del Oriente una propuesta pa que tresmitan al Principáu la esixencia de que los vecinos d'esta fastera d'Asturies dexen de tar discriminaos na atención sanitaria, al depender d'un hospital que nun ye de titularidá pública, y les pésimes condiciones llaborales que carez el personal sanitariu.

L'escritu ellaboráu por UNIDÁ señala que "l' Hospital del Oriente ye l'únicu hospital d'Asturies que, nun tando incluyíu na rede pública, atiende a un área sanitaria completa, l'área sanitaria VI, compuesta por 14 conceyos: Llanes, Ribesella, Ribedeva, Parres, Piloña, Colunga, Caravia, Cangues d'Onís, Onís, Amieva, Ponga, Cabrales, Peñamellera Alta y Peñamellera Baxa". Añade amás que "
la plantiya del Hospital del Oriente ye totalmente insuficiente en melecina, enfermería y personal auxiliar. Baste dicir que'l so presupuestu ye inferior en dellos millones d'euros al de Xarrio (Hospital del Occidente) y tien un 30% menos de cames, magar qu' atiende a una población asemeyada en tamañu y característiques".
Ente les carencies más graves que denuncien tan "el tener una única ambulancia, casi siempres colapsada, la inesistencia d'una seición de quimioterapia pa enfermos de cáncer, l'ausencia de mélicu dermatólogu, y la inesistencia d'un área específica p'atender a los ñeños, que queden espuestos al riesgu de contaxos al compartila colos adultos".

Finalmente dende UNIDÁ piden "la integración ensin más demora del Hospital del Oriente nel SESPA, refugando al mesmu tiempu que seya dirixíu por una fundación pública, dalgo que namás s'esplica por un menor gastu en salarios y condiciones llaborales del personal y en medios materiales, lo que ye una causa direuta d'una peor situación sanitaria del Oriente, discriminatoria con respeutu a les demás árees sanitaries d'Asturies", asina como la "homologación a tolos efeutos, llaborales y salariales, del personal del hospital cola rede sanitaria pública, tresformándolo en personal llaboral, dalgo que según tolos informes xurídicos ye perfectamente afayadizo" y "una urxente dotación económica que faiga posible incrementar la plantía y aumentar y meyorar los medios materiales".