UNIDÁ denuncia l'intentu de relegar a Asturies na reforma estatutaria propuesta pol PSOE

La Xunta Coordinadora d'UNIDÁ dio anuncia de les actividaes entamaes
pal 8 de setiembre pola coalición, que se presentó per primer vez
a unes elecciones autonómiques y a conceyos el pasáu mes de mayu
llogrando representación en dellos consistorios. Pa la coalición
esti Día de la Nación Asturiana "va constituir una muestra
de la nuesa posición frontalmente opuesta a una reforma estatutaria que
nun reconoza la realidá nacional d'Asturies, la oficialidá del
asturianu y un modelu de financiamientu que s'axuste a les nuestres necesidaes
y asuma les nuestres peculiaridaes".

L'actividá central del programa va ser un mitin políticu a la
una de la tarde na cai'l Sol d'Avilés "nel que intervienen
representantes d'UNIDÁ, tanto a nivel nacional como local, y nel que se
va contar cola participación de colectivos sindicales y sociales con
presencia n'Asturies y nel que se va recordar especialmente la efeméride
del 70 aniversariu de la proclamación de la soberanía por aciu
del Conseyu Soberanu". Darréu va facese una xinta a la que van

asistir militantes y simpatizantes de la coalición.

Finalmente dende la coalición afirmen que quieren enseñar
"la otra cara de la moneda del país idílicu y festivu
d'Areces remarcando que sí ye posible articular polítiques
alternatives en clave asturiana, d'esquierdes y ecoloxistas" lo mesmo que
"frente a los intentos de reforma estatutaria del PSOE que quieren tener a
Asturies como una comunidá de tercer división, y nel contestu
d'un futuru próximu nel que dellos territorios del estáu
tán afirmando la so realidá nacional, ye importante renembrar
qu'Asturies sí ye una nación y que nun pue ser relegada
entós al vagón caberu del estáu".