Unidá denuncia "falta de rigor llegal" na retirada de la so candidatura de Xixón

La coalición Unidá dio ayeri una rueda de prensa na que calificó de "inxusticia" l'anulación final de la so candidatura por Xixón, dempués de nun almitir a trámite'l Tribunal Constiucional el recursu que presentare l'agrupación política contra l'anulación de la candidatura pola Xunta Electoral de Xixón, que se basaba na incapacidá por parte de los miembros d'Andecha Astur presentes na candidatura pa facer usu de la sigla y na non resolución por parte de la coalición d'esta circunstancia.

Dende Unidá aseguren que en nengún momentu se-yos requirió pa que retiraren el nome d'AA nesta candidatura y denuncien incluso qu'hebo otres candidatures a conceyos que se dieron de pasu poles Xuntes Electorales, casu de la de Samartín del Rei Aurelio, onde coincidíen dos llistes col nome d'Andecha Astur, partíu nel que dos grupos enfrentaos lluchen pol control de la sigla de la organización. El TC dio por bonu'l dictame que se dio n'Asturies ensin almitir a trámite'l recursu d'Unidá, dalgo que la formación asturiana entiende que pue tener rellación "cola montonera de casos en qu'anda metíu estos díes el TC".

La coalición nacionalista califica tol procesu de "atropellu a los derechos civiles" nel que la "mala fe y la falta de sentíu común xugaron un papel importante". Dende Unidá - Xixón anuncien que van intensificar la campaña pa pidir el votu nes autonómiques dende Xixón, que sedría "una muestra de solidaridá pa cola candidatura escluyida"