Unidá anuncia que va dar los pasos pa reorganizase y trabayar nos próximos años

El que fuera candidatu a la presidencia nes pasaes elecciones pola coalición Unidá, Ignaciu Llope, fexo ayeri públicu un comunicáu en que respondía a la salida de la coalición de la formación "Los Verdes-Grupu Verde". Llope califica les pasaes elecciones como la "primera piedra d'un proyectu que quier ser un revulsivu nos años que vienen na inmovilista política asturiana" y, contra cualquier rispiu de pesimismu aseguró que la coalición na que tamién tan Izquierda Asturiana (IAS) y parte de la formación nacionalista Andecha Astur, que pasó per un procesu d'escisión "ta nun procesu de construcción como alternativa política estable, con nueves incorporaciones y dotándose d'una estructura operativa pa ser una ferramienta política útil pa la sociedá asturiana". El que fuera candidatu'l pasáu mes de mayu esplicó qu'Unidá "mantién intactos los sos compromisos y convicciones al respective de la política medioambiental, asina como la práctica totalidá de los apoyos y militantes ecoloxistes que se sumaron nel momentu de presentase a les elecciones, y que siguen confiando nel proyectu, como nos lo ficieron saber en repetíes ocasiones". El líder de la formación esplicó que respeta la decisión de la formación ecoloxista pero que'l proyectu sigue alantre y pa ello nel mes de xunetu les formaciones que s'axunten n'Unidá cuenten con aprobar esti mes de xunetu les bases pa la so reorganización y trabayu nos próximos años.