Unión Asturianista va denunciar el llibru anónimu que fai propaganda del Gobiernu énte la Procuradora Xeneral

La coalición Unión Asturianista, que formen la Unión Renovadora Asturiana (URAS) y el Partíu Asturianista (PAS) dio anuncia de que va presentar énte la Procuradoría Xeneral d'Asturies que dirixe MªAntonia Fernández Felgueroso y énte'l Defensor del Pueblu un testu nel que solicita que s'entame una investigación poles posibles irregularidaes o delitos que pudieren cometese na "redacción, impresión y repartu" del llibru anónimu "Construyendo Asturies, una visión rexonal del sieglu XXI".

Esta obra, editada a color y en papel d'alta calidá, ta llegando estos díes a les puertes y buzones de les viviendes asturianes en versiones adaptaes a los conceyos onde se reparte, y nella faise anuncia allabanciosa de los proyectos y iniciatives del Gobiernu asturianu a lo llargo de la presente llexislatura. El llibru inclúi declaraciones de profesionales y xente rellacionao con cada iniciativa que s'anuncia nel mesmu, dándose'l casu de que delles persones qu'apaecen nelli denunciaron que naide-yos pidiere permisu pa ello y que les declaraciones que-yos reproducen na obra tan descontestualizaes y garraes d'otres fontes, estractándose d'entrevistes y declaraciones a periódicos feches ensin rellación con esta obra, según supo Asturies.com.

Cuasimente toles fuerces d'oposición política al gobiernu asturianu rellacionaron la obra con un intentu de facese propaganda en tiempu preeelectoral esmuciendo la llei de Propaganda Institucional que regula estes actuaciones, anque'l Gobiernu asturianu negó yá delles vegaes tener rellación nenguna cola publicación, que-y atribuye a la imprenta madrileña "Avenida Gráfica" de Leganés. El Presidente en funciones Jaime Rabanal llegó a amenazar al líder del PP Ovidio Sánchez con dir a xuiciu poles sos declaraciones al respective nes qu'aseguraba que la obra se financiare con coacciones a les empreses que s'anunciaben nella.