Una xuez manda repetir el Plenu estraordinariu de Siero pa votar la moción de censura al alcalde

El Plenu estraordinariu de Siero del 31 d’ochobre pasáu, onde se decidió nun siguir cola moción de censura contra l’alcalde, ha de repetise nun plazu de cinco díes. Esta sentencia xudicial podría permitir a FAC algamar el control del Conceyu.
 
Según informaron fontes del Tribunal Superior de Xusticia d’Asturies, nel fallu, la maxistrada titular del Xulgáu Contencioso-Alministrativu númberu 6 d'Uviéu estimó’l recursu interpuesto por 13 ediles sierenses y ordena a l'alministración demandada la celebración, nel plazu de cinco díes, del Plenu Estraordinariu que se convocara pal día 31 d'ochobre del 2011, "con cuenta de facer posible, tres el preceptivu debate, la votación de la moción de censura subscrita polos recurrentes". La moción de censura rexistráronla contra l'alcalde socialista Guillermo Martínez los seis conceyales de Foro Asturias Ciudadano (FAC), cuatro de los seis del PP, los dos de la Plataforma Vecinal de La Fresneda y l’únicu edil de Conceyu. Esto ye, 13 de los 25 conceyales qu'integren la corporación. Esta situación motivó que los cuatro conceyales del Grupu Municipal Popular proponentes de la moción, Luis Vázquez Suárez, María Jesús Berdasco Sierra, María Engracia Valle Quirós y Mauricio Bogomak Medeiro, resultaran espedientaos pol partíu y, de manera cautelar, quedaran suspendíos de funciones y de militancia.
 
Basándose nuna sentencia del Constitucional, la xuez caltién que "pese a que los cuatro conceyales tán suspendíos de funciones, lo mesmo que de militancia, tanlo cautelarmente o provisionalmente, polo que nun cabo entender que los mesmos dexaren de pertenecer al grupu políticu municipal al que s'ascribieron al entamu del so mandatu, dao qu'esa suspensión cautelar nun pue contrastase ensin más a la espulsión". Entiende amás que "nun siguir la tramitación de la moción de censura torgó que los conceyales firmantes pudieren exercitar el so derechu de control de gobiernu, función básica del exerciciu del derechu fundamental a la participación política". Contra la sentencia, que nun impón les costes a nenguna de les partes, cabe interponer recursu d'apelación nel plazu de 15 díes.
 
Alcaldía para FAC
 
De salir alantre la moción de censura, como paez, FAC fadríase cola alcaldía, ocupando’l puestu de primer edil Eduardo Martínez Llosa. Asina, el Conceyu de Siero sumaría’l so cuartu alcalde en dos años.