Una web investiga na represión na posguerra civil n'Asturies

A los quince díes d'esbarrumbar el Frente Norte na Guerra Civil española, l'ocho de payares de 1937, l'exércitu de Franco celebró en Xixón los trés primeros conseyos de guerra, pel procedimientu sumarísimu d'urxencia, contra quince prisioneros republicanos. El tribunal militar permanente presidíu pol comandante de caballería Luis de Vicente Sasiaín, robló esi mesmu día día catorce condenes a muerte y una a cadena perpetua. Trece homes y una muyer foron los primeros afusilaos por orde d'estos tribunales.

El cálculu del númberu final de víctimes de la represión institucionalizada naquella dómina ye difícil d'apautar, y investigadores particulares lleven años revolviendo pelos documentos de la época pa ser a facer el mapa de la represión n'Asturies naquellos años de la posguerra, un llabor nel que rescamplen los trabayos de Marcelino Laruelo. Agora parte d'esi trabayu pue consultase na rede gracies a la revista electrónica "Asturias Republicana" qu'estrenó esta mesma selmana una base de datos coles identidaes de más d'ocho mil homes y muyeres encausaos polos tribunales militares de la posguerra namás que nel conceyu de Xixón. El completu trabayu de documentación presenta fiches completes con nome y apellíos filiaciones polítiques, feches del Conseyu de Guerra y sentencia, amás de fecha del afusilamientu y información pormenorizao de los que morrieron dientro de les cárceles o los que se-yos dio muerte "pasiándolos" un métodu consistente en sacar al deteníu en coche, matalu en cualquier parte lloñe de la ciudá y dexar el calabre nel sitiu.

La base de datos de represaliaos n'Asturies ellaborada por "Asturias Republicana" tien xente de prácticamente toles procedencies, tanto asturianes como estatales y hasta estranxeres, con 93 casos de ciudadanos estranxeros de los que se llegó a executar a 23.