“Una solución ensin perda de trabayu”: les 3 propuestes d'un centenar de docentes d'asturianu

Asturies.com tuvo accesu al documentu ellaboráu por maestros afeutaos, qu'analiza 5 consecuencies del plan de la conseyería no que respeuta a la especialidá de Llingua Asturiana, y faló con profesores que participaron na so redaición.

Docentes de Llingua Asturiana y Lliteratura en Primaria –101 hasta’l momentu– roblen esti testu nel que presenten 3 propuestes pa que nun haya perda d’emplegu y ameyora la calidá educativa. Un total de 40 maestres y maestros d’asturianu aconceyaron la selmana pasada de manera telemática pa organizase énte la posibilidá de perder el so puestu de trabayu cola idea d’Educación de combinar places asitiaes a menos de 15 quilómetros pa consiguir un horariu completu itinerante. La precaria situación de la materia d’asturianu, con trés de cada cuatro profesores a media xornada, convierte a esta especialidá na única con un problema real de perda d’emplegu al nun poder absorber la xunión de places a tiempu parcial con xubilaciones como asocede con otres asignatures.

Estos trabayadores sofitaron un documentu robláu por docentes de toles especialidaes, pero trabayaron tamién nún específicu pola situación estraordinaria d’asturianu –que cuenta nestos momentos con 101 firmes y que sigue sumando sofitos–, yá en manes de los sindicatos educativos. Nestos díes próximes preténdese facelo llegar a l’Academia de la Llingua Asturiana y a coleutivos como la Xunta pola Defensa de la Llingua Asturiana y Iniciativa pol Asturianu.

Nun primer puntu presenta’l marcu llegal actual del asturianu y del gallego-asturiano, pa depués pasar a presentar a situación actual del profesoráu de Primaria. “Na última convocatoria d’agostu 2023, ufiertáronse 34 places a xornada completa (de les que 16 se formaron itinerando con otros centros) y 154 a media xornada. Por mor d’ello, el 82 por cientu de los maestros y maestres de Llingua Asturiana y Lliteratura trabayen a media xornada”, espresa.

Éstes son de 4 o 5 díes, con ratios de 26 o 27 neñes y neños nos centros qu’axuntos niveles o grupos, y con impartición d’otres materies, docencia compartida o coordinación de proyeutos pa completar horariu, apunten.

Doble llectura de la fusión de places

La midida de la conseyería supondría pasar de 34 completes a 94 y de 154 medies a 36, esto ye, 60 persones más nuna situación llaboral meyor. Pero tamién que 58 docentes “que lleven años impartiendo la materia de Llingua Asturiana y Lliteratura van quedar ensin vacante y ensin poder trabayar pola especialidá na que lleven años formándose y especializándose”. “Ensin un procesu selectivu, col alcuerdu d’interinos vixente, nun hai posibilidá d’actualizar méritos, polo que tampoco nun hai manera de ver reconocida la so esperiencia, formación, difícil desempeñu, etc.”, espresa’l documentu

Amás de la reducción de la ufierta de vacantes al entamu del cursu, otres consecuencies son la mengua de personal nos centros educativos, dificultaes nos centros pa organizar los horarios y pa la coordinación docente, proyeutos y otres actividaes educatives, y escesiva carga llaboral y mental pa los docentes itinerantes. Llueu d’una esplicación fonda de caún d’estes cinco consecuencies, los profesores firmantes ponen enriba de la mesa trés propuestes pa que una midida “que nun principiu a naide puede resultar negativa”, la reducción de medies xornaes, nun suponga una perda d’emplegu.

La primera ye la ufierta na etapa d’Educación Infantil de les materies d’asturianu y gallego-asturiano. “Esto nun sólo supón un aumentu a xornada completa en munchos centros, sinón que ye un derechu de los neños y les neñes, recoyíu na Llei 1/1998, de 23 de marzu, d’Usu y Promoción del Bable/Asturianu”, rescamplen.

La segunda ye aceptar itineraciones “pero teniendo en cuenta otres variables, non sólo 15 quilómetros de distancia ente centros”, yá que “enfrentar la dificultá y la incertidume d’itinerar ente múltiples centros non sólo contribúi a la precariedá llaboral, sinón que tamién impacta negativamente na calidá de la enseñanza y aprendizaxe de la llingua asturiana nes nueses escules”. Completa les propuestes una reducción de ratios “pa ufrir una educación de calidá”.

“Si de verdá hai voluntá real de dignificar l’asignatura y les condiciones de los maestros y maestres que trabayen a media xornada, pueden asumise delles acciones que sí supondríen una solución a la situación actual ensin perda de puestos de trabayu y calidá educativa”, conclúi’l documentu, qu’insiste na idea de “completes sí, pero non de cualquier manera”.

Xunta de docentes d’asturianu’l 6 d’abril

Los impulsores de la xunta de la selmana pasada tán movilizando a les sos compañeres y compañeros pa celebrar un segundu aconceyamientu’l 6 d’abril, cola intención de que nesta ocasión sía presencial, polo que se ta buscando un llugar pa ello. La esmolición causada pola propuesta d’Educación provocó una rápida organización ente’l coleutivu a partir de grupos de WhatsApp ente persones que na so mayor parte nun se conocíen.

El primer pasu foi la ellaboración d’esti documentu, col que pretenden dar a conocer la so situación y aportar soluciones que lleven a una meyor situación de l’asignatura y que nun conlleve una perda d’emplegu. “Dalgunos llevamos 10 años trabayando de profesores d’asturianu, de manera comprometida, poniendo esfuerciu p’aumentar la matrícula, y quedamos fuera”, espresa una docente que quier más nun dar el nome.

“Tamos toos d’alcuerdu en trabayar a completa, pero non con esta midida”, añade al tiempu que pon el focu n’Infantil: “Ehí l’asturianu tien que tar por llei y metelu sería clave pa la normalización del asturianu. Los maestros faen un llabor indispensable pa normalizar l’idioma; ye necesario que los alumnos salgan con una bona base de la escuela”, recuerda.

Na semeya, escolines y escolinos del CP Salvador Vega Berros de Sariegu.