Una encuesta espeya’l pocu enfotu de les TV locales asturianes n’autonómica

La revista especializada nel sector de la comunicación "Imagen & Comunicación" asoleya nel so últimu númberu una encuesta sobre les tv locales fecha ente los cargos directivos de televisiones locales asturianes. La consulta espeya'l paecer de 14 responsables de televisiones locales énte'l cambéu del panorama audiovisual y informativu n'Asturies cola creación de la TV autonómica y lo cierto ye que nun hai gran enfotu nella: el 57% ven mal la so creación y al 72% abúlta-y que'l mayor error del que va tener que cuidase la RTPA va ser del de nun contar col sector audiovisual asturianu.

Les rellaciones ente televisiones locales y Gobiernu asturianu nun pasen del aprobáu raspiáu na encuesta, valorándoles los responsables de les emisores locales en 5,4 sobre diez. El fechu de que la propaganda institucional de les TV locales namás represente'l 15% de los ingresos d'estes emisores pue tener que ver nesta floxa valoración.

Les TV locales asturianes enfréntense a una papeleta difícil cola llegada de l'Ente autonómicu. Ello ye que mientres otres tv autonómiques como la gallega o la catalana llegaron primero, cubriendo dempués les locales los requexos de mercáu y públicu que desatendíen les públiques, nel casu asturianu la RTPA va apaecer nun momentu en qu'esiste una rede d'emisores locales, dalgo que va llevar inevitablemente a problemes de competencia, como se reconoz na introducción a la encuesta.