UNA acusa al Principáu de prevaricar nel casu de Morala

UNA considera grave la sentencia del Tribunal Supremu que da la razón al dirixente de la CSI, Juan Manuel Martinez Morala, por ser incluyíu na llista de trabayadores prexubilaos pa que nun pudiere presentase a les eleiciones sindicales.

Pa UNA, el Principáu prevaricó cola única intención de facer desapaecer de l'actividá sindical en Naval Xixón a un trabayador "cafiante".

Faustino Zapico, como voceru de la organización, declaró que “el gobiernu asturianu de PSOE ya IX tendrá qu'esplicar por qué aneciaron n'escluyir a Morala de les elecciones sindicales del 2005 al astilleru xixonés” y consideró como llamentable “la campaña constante, de l'autodenominada esquierda plural, dirixida a vulnerar los derechos sindicales de la CSI, como yá demostraron delles sentencies de los tribunales nesti y otros conflictos ente'l sindicatu y diverses instituciones gobernaes por PSOE ya IX”.

Dende UNA consideren que “PSOE ya IX tán enfotaos dende cuantayá en desaniciar cualquier voz discrepante que pueda existir a la so esquierda, porque dexa n'evidencia que les polítiques que tán desendolcando son de too menos progresistes” y nesi sen “desaniciar a un dirixente históricu del sindicalismu de la industria naval de Xixón, perteneciente al sindicatu más críticu cola xestión de Naval Xixón, paecía un oxetivu prioritariu”.

Nerviosismu de los gobernantes
Pa UNA esti despropósitu demuestra “el mesmu nerviosismu de los gobernantes, qu'asumen que la crítica de tou coleutivu que defenda posiciones a favor de los trabayadores, medioambiente o Asturies en xeneral, ye un lluxu que nun pueden permitise” especialmente agora “col xiru neolliberal del gobiernu asturianu, que ye una vuelta de tuerca más sobre los trabayadores, pensionistes, autónomos, investigadores y paraos” concluyó Faustino Zapico.