Skip to content

Un xuez condiciona la incineradora a la modificación del Plan de Residuos

Avientu 14, 2011 por E.P. / Redacción

El xulgáu de lo Contencioso-alministrativo númberu 1 d’Uviéu estimó un recursu contra l’alcuerdu de la Xunta de Gobiernu de Coxersa pal aniciu de los trámites de la incineradora. El xuez condiciónala a la modificación del Plan de Residuos.
 
Na sentencia, el maxistráu sorraya que’l Plan Básicu de Xestión de Residuos aprobáu pola Alministración en xunetu del 2001 nun contién ente les sos previsiones referencies a una planta de valorización y incineración. Asina, y "ensin pexjuiciu de que sía efectivamente un sistema válidu pol que pueda optase con ocasión de l’aprobación d’un plan de xestión nuevu”, nun estima viable “optar por un modelu que nun ye’l previstu”. Por ello, conclúi que nel plan vixente "nun se ta contemplando’l modelu de tratamientu de residuos por incineración" y, mentes ésti nun se modifique, nun cabe que Coxersa “estableza una actuación que va en contra de lo establecío na Llei de residuos".
 
Agora, el Consorciu tien un plazu de 15 díes pa recurrir esta sentencia que vien dada por un recursu presentáu nel 2010 pola conceyala de IX-LV nel Conceyu de Mieres, Olga Álvarez, y pola ex edil y responsable actual d’Equo n’Asturies, Inés Prada.
 
La Coordinadora pide dimisiones
 
Tres conocer la sentencia, la Coordinadora Ecoloxista d’Asturies espublizó un comunicáu nel que pide la dimisión de los “responsables del PSOE y del PP que votaron na Xunta de Gobiernu de Coxersa” a favor del alcuerdu p’aniciar los trámites ambientales y alministrativos pa la construcción de la incineradora “sabiendo de la so illegalidá”.

Comparte...