Un tren de vapor festeya los 100 años del Vasco-Asturianu

El Muséu del Ferrocarril de Xixón presenta dende esti mes la esposición que celebra los primeros cien años dende la inauguración de la llinia de ferrocarril de la compañía vasco-Asturiana. El programa organizáu por esti cumpleaños tan importante va completase con un ciclu de conferencies que va desarrollase a lo llargo de los meses de setiembre, ochobre y payares.

La muestra del centenariu del "vasco" diséñase como un viaxe señaldosu pela llínia del Fierrocarril, un recorríu que tien por filu conductor la mesma historia ferroviaria y nel que cada estación representada va venceyada a un finxu históricu concretu. Col.lanzo, Cabanaquinta, Uxo, Figareo, Mieres, Sotu Ribera, Fuso, Uviéu, Trubia, Vega, Grau, San Román, Pravia y San Esteban son delles de les paraes d'un itinerariu que recrea estremaos aspectos técnicos, económicos, sociales, políticos, artísticos y territoriales de los qu'esti ferrocarril y los sos usuarios fron protagonistes a lo llargo de cien años. La organización de la esposición encóntase nuna serie d'unidaes básiques instalaes nes sales d'esposiciones temporales, andén principal, playa de víes y nave polivalente del Muséu del Ferrocarril d'Asturies. Los conteníos tanto n'oxetos, documentos y imáxenes que s'enseñen por primer vegada, como n'otros que yá son parte de los valiosos conteníos enxertos na colección permanente del Muséu, qu'atecha'l mayor conxuntu de pieces y documentación que se conserva d'esti ferrocarril.

La historia del "Vasco" ye una de les más emblemátiques de la industrialización asturiana na llende del entamu del sieglu XX. Creau por capitales vascos, que queríen la llinia pa sacar hasta'l puertu de San Esteban el carbón de la cuenca del Ayer y del Valle de Turón, el "Vasco" foi una de les empreses que más capitales movieron pa constituyise, teniendo nel intre en que se funda la empresa un capital social de 15 millones de pesetes, cifra que facía d'elli la segunda empresa más grande d'Asturies.

Pelos sos rieles marchaba tolos años una media de cerca del millón de tonelaes de carbón, que s'embarcaba lo más d'ello en puertu de San Esteban de Pravia pa llevalo a quemar nes fábriques d'Altos Hornos de Vizcaya. La compenetración ente dambes empreses foi tan estrencha que en dellos momentos la siderúrxica vasca y el ferrocarril asturianu tuvieron el mesmu equipu de xerencia.

La crisis del carbón, l'afogamientu del puertu de San Esteban, en que nun podíen entrar los barcos modernos de mas caláu, y la construcción de la térmica de Soto Ribera marcaron a lo llargo de los años sesenta l'allancamientu de la llinia, qu'intentó reconvertise al tráficu de pasaxeros ensin ser a ello nuna época en que la carretera yá facía muncha competencia. Nel añu 1972 el Vasco pasó a manes del estáu, que lu enxertó en FEVE, l'ente de fierrocarriles de vía estrencha nel qu'anguaño'l "Vasco" sobrevive como una de les sos llinies de cercaníes.

Capítulu aparte merecen les sos estaciones, toes de gran interés arquitectónicu y cargaes del gustu d'entesieglos, con estilos que van dende'l rexonalismu montañés al modernismu, rescamplando ente elles la gran estación central d'Uviéu, un edificiu que les pales escavadores llevaron per delantre en 1989 consumando ún de los grandes escándalos sobre conservación del patrimoniu n'Asturies.

Con motivu de la celebración del centenariu, l'Asociación d'Amigos del Ferrocarril y los conceyos de Muros y Pravia ponen un tren de vapor que va facer el trayectu ente Pravia y San Esteban los díes del 2 al 4 d'agostu. El tren Sal de Pravia a les 11:30 y 17:30, y de San Esteban a les 13:00 y les 19:30h, costando'l billete d'ida y vuelta namás que trés euros pa un trayectu de cerca de media hora qu'amás va ser en vagones de madera. La máquina encargada de poner el serviciu ye la "Aurrerá" una pieza de 1898 cedida pol Muséu Vascu del Ferrocarril y que ye la que sal na semeya qu'acompaña esta información.