Un Piñole inéditu pa celebrar l'antroxu

La Fundación Municipal de Cultura de Xixón y Caxastur inauguren esta mañana la esposición "Visiones d'antroxu" que tien ún de los sos mayores atractivos na esposición, por primer vegada énte'l públicu, d'un óleu de Nicanor Piñole que nun se conocía hasta agora y que va poco que-y lu mercó la caxa asturiana financiera a un coleccionista particular asturianu. El cuadru en cuestión entitúlase "L'intierru la sardina" y mide 55 x 75 centímetros, teniendo fecha de realización nel añu 1915

Francisco Crabiffose ye'l comisariu d'esta esposición que va tar abierta en Muséu Nicanor piñole hasta'l prósimu 6 de marzu y qu'axunta obra d'otros quince autores cola temática común del antroxu, ello xunta una importante colección de carteles de fiestes y otros exemplos de diseñu gráficu aplicáu a la temática antroxera dende mediaos del XIX hasta la Guerra Civil.

D'otra manera, dende esta selmana pue visitase, esta vegada n'Uviéu, la esposición "Figures de la Francia Moderna, d'Ingres a Toulouse-Lautrec" que va tar na Sala del Banco Herrero hasta'l 31 de marzu. Son 36 cuadros y 3 escultures qu'axunten lo meyor del arte frances del sieglu XIX dende'l romanticismu hasta l'impresionismu, definiendo los pegoyos en que van tenese les vanguardies del XIX con obres d'autores como Alfred Sisley, Henri Toulouse-Lautrec, Renoir, Paul Gauguin, Ingres, Delacroix, Chassériau, Antonie Jean Gros, Gustave Courbet, Camile Corot, Honoré Daumier o Jean Françoise Millet.

Esta esposición ye posible gracies a la Fundación Juan March y vien a Asturies per aciu de la collaboración ente la Conseyería de Cultura, Bancu Sabadell y la mesma fundación Juan March