Un llibru esplica los 246 castros del país

L'arqueólogu asturianu Alfonso Fanjul Peraza, que yá espublizare trabayos como "El complexu castreñu de los astures tresmontanos" ta acabante d'asoleyar, cola collaboración del Conceyu de Teberga, editor de la obra, el llibru "Los castros de Asturias, una revisión Territorial y Funcional".


El llibru ye amañosu e interesante pal aficionáu a les cuestiones d'hitoria antigua d'Asturies porque ye'l primeru en que los 246 castros que se conocen n'Asturies apaecen caún con una ficha coles sos principales característiques, coordenaes xeográfiques y referencies cartográfiques. En cuantes a los propósitos investigadores de la obra, l'autor defende yá nel entamu de la obra el so papel como "primer revisión del mapa castreñu asturianu". Esta revisión plantégala l'autor a partir d'un intensu trabayu de campu nel qu'identifica realidaes arquolóxiques qu'apaecíen con claridá pero que quedaben tapecíes por nun tar documentaes en condiciones en trabayos anteriores, lo que lleva a conclusiones novedoses enforma sobre aspectos como les fortificaciones qu'arrodiaben a munchos castros o la esistencia d'una sociedá xerarquizada yá enantes de la invasión romana lleven a Alfonso Fanjul a concluyir que la so obra abre campos nuevos nel estudiu de la edá del fierro n'Asturies.

L'autor reconoz, con too y con ello, que l'estudiu que se presenta nesti llibru nun ye tolo exhaustivu que quixere, y anuncia trabayos más monográficos partiendo del marcu xeneral que se propón na obra, na que se planteguen como cuestiones esenciales apautar hasta onde pue falase de la esistencia d'un contactu cultural y económicu inter-cantábricu, investigar la importancia y significáu de les construcciones defensives y tamién conocer si la economía de los astures yera mayormente agrícola o ganadera.