Un informe denuncia la pasividá de la mocedá de les Cuenques

El presidente del Conseyu de la Mocedá Paulino Feito y el sociólogu y profesor de la Universidá d'Uviéu Holm-Detlev Kohler presentaron ayeri un estudiu sobre la mocedá asturiana de les Cuenques Mineres. Ente les conclusiones del mesmu rescampla como ente la mocedá d'estos conceyos ta guañando "un discursu de pasividá" énte lo que se camienta que ye "una situación ensin salida".

L'estudiu conseña como'l Nalón, Caudal y Narcea son les zones d'Asturis onde la emancipación de la casa de los padres tarda más, siendo que'l 60% de la xente ente 25 y 29 años de les Cuenques inda nun tan independizaos, siendo'l perfil de los independientes el de xente con vivienda en propiedá y bona situación económica, dalgo que pinta un perfil de mocedá conservadora, que namás cola de casa cola idea de facer una familia. El sociólogu alemán asitiáu n'Asturies Holm-Detlev Kohler sorraya como muncha xente mozo vive nes cuenques en cases onde naide trabaya, colo que la "cultura del trabayu industrial" que marcó les Cuenques ta perdiéndose.

L'estudiu conseña tamién como más del 50 por cientu de la mocedá de les Cuenques estudia y como p'acceder a un trabayu tien d'emigrar al centru d'Asturies y tamién a Madrid o al estranxeru. Un datu que llama l'atención del sociólogu ye que la mocedá de les Cuenques tenga una idea enforma negativa de partíos políticos y organizaciones sindicales cuando d'ellos vinieron les prexubilaciones y les beques que-yos tan subvencionando la vida".