Un estudiu premiáu en Galicia califica l’asturianu de “modalidá llingüística”

La Dirección Xeneral de Xuventú y Solidaridá de la Xunta de Galicia dio-y el so premiu añal "derechos civiles en Galicia" que convoca en collaboración col "Movemento polos Dereitos Civis" a un estudiu qu'analiza la situación xurídica del gallegu n'Asturies y Castiella y Lleón. Ellaboráu pol llicenciáu en derechu Carlos Bello Stout, el trabayu denuncia la "vulneración de los derechos llingüísticos" d'un total de los 50.000 "gallegófonos" qu'asitia nel Navia-Eo, proponiendo midíes pa iguar esta situación, ente elles la redacción d'un estatutu comarcal pal Navia-Eo y el reconocimientu del gallegu na revisión del Estatutu asturianu. L'estudiu premiáu pol Gobiernu gallegu carga contra les midíes de política llingüística feches dende Asturies y mui especialmente contra l'Academia de la Llingua Asturiana, de la que diz que "presentó una innovadora y creativa normativa ortográfica pal gallegu, coincidente cola utilizada pal bable" y pola que l'ALLA tamién se mandaría "pa una inédita modalidá de deturpación de la toponimia". El testu de Bello Stout afirma que ye "una paradoxa" que "una modalidá llingüística con notables carencies se dedique a tutelar a una llingua" en referencia al asturianu y, con reconocer que'l gallegu tamién ye una llingua "dañada" en Galicia, afirma que "xuega nuna división diferente".

L'estudiu pue descargase n'internet dende la web del "Movemento polos Dereitos Civis"