Un estudiu diz que'l 52% de la mocedá asturiana identifícase más con Asturies que con España

Un 52% de la mocedá d'Asturies diz identificase más con Asturies que con España, según datos d'un estudiu de la Fundación Santa María. Con too y con ello, hai otres dos comunidaes autónomes que superen a Asturies en sentimientu de pertenencia a la tierra por parte de la mocedá, siendo les Islles Canaries onde esti sentimientu de pertenencia a la tierra tien más raigón al declarase'l 62.5% de la mocedá canaria más canaria qu'española. N'Euskadi, esti sentimientu llega al 60.3% de la mocedá.

Otros indicadores sobre la mocedá d'ente 15 y 24 años conseñaos nel estudiu d'esta fundación católica, venceyada a la editorial especializada en llibros de testu escolares y lliteratura infantil y xuvenil SM rescamplen que menos del 50% de los 4.000 mozos y moces encuestaos se declaren católicos, un datu que france cola tendencia mayoritaria pola relixón católica que se conseñaba nos anteriores estudios que fexere la Fundación dende 1982 p'acá. No político, la mocedá de les comunidaes vasca, gallega, catalana y la de Castiella y Lleón son los que se declaren más d'izquierdes, mientres que la de la Comunidá Valenciana, Castiella - La Mancha y Andalucía ye la más derechizada.