Un ensayu d’Héctor Braga sobre l’asturianada tradicional, XXIX Premiu Máximo Fuertes Acevedo

‘Nel cantu la memoria. Ensayu sobro l’asturianada tradicional’ ye’l trabayu merecedor del XXIX Premiu Máximo Fuertes Acevedo d’ensayu. El so autor ye Héctor Braga, músicu y intérprete que yá afondara nesti tema na so tesis doctoral, con sobresaliente cum laude, y n’otros artículos d’investigación en revistes especialidaes.

El xuráu conformáu pa decidir al ganador d’esti gallardón, con una recompensa de 6.000 euros y la so espublización, rescampló d’esta obra que ye una “aportación al estudiu y divulgación de la música y cultura asturianes nun trabayu rigorosu y bien documentáu sobre l’asturianada atendiendo a toles estayes qu’intervienen nesta gran seña cultural d’Asturies”. Amás, el fallu emponderó “l’usu d’un llinguaxe natural, fluyíu y correctu qu’imprime axilidá y amenidá a la llectura de la obra”.

Juncal Mónica García Velasco, xefa de serviciu de Planificación Llingüística, presidió dichu xuráu por delegación d’Antón García, direutor xeneral d’Aición Cultural y Normalización Llingüística. Esti tuvo formáu polos filólogos Marta López Fernández y Jorge Arturo Sierra Álvarez, y el periodista Damián Barreiro, ganador de la edición pasada por ‘Asturianía kitsch: decálogu de la cultura pop ástur’, faciendo’l llabor de secretaria Lourdes Álvarez, filóloga adscrita a la Viceconseyería de Cultura, Política Llingüística y Deporte.

Nacíu en La Felguera nel 1980, Braga ye doctor n’Historia del Arte y Musicoloxía pola Universidá d’Uviéu, profesor superior de Música y Etnomusicoloxía polos conservatorios d’Asturies y Castilla y Lleón, títulu profesional de Gaita y máster en Comunicación Cultural. Músicu y intérprete d’asturianada con delles victories en concursos dende la categoría d'aficionaos a l'absoluta nel periodu 2007-2015, la so tesis doctoral ‘La asturianada. Estudio etnomusicológico de un género vocal de tipología popular’ recibió sobresaliente cum laude y tien firmaos en revistes especializaes artículos d’investigación.

Tercer gallardón en fallase

El Máximo Fuertes Acevedo ye’l terceru de los ocho Premios Lliterarios 2023 en fallase. Enantes diose a conocer que Xon de la Campa ganó’l XV Premiu Alfonso Iglesias de cómic con ‘Misteriu nel soterrañu’ y Xosé Anxelu Gutiérrez Morán el XIX Premiu Xuan María Acebal de poesía con ‘Les hores de lluz’.