Ún de cada cuatro mozos asturianos qu'emigra tien estudios superiores

El 71% de la xente mozo que sal d'Asturies pa trabayar tiene namás estudios secundarios, mientres que'l 25,53 % tien formación universitaria, según diz l'estudiu "Emigración, Mocedá y Asturianía" qu'ellaboró'l Conseyu de la Mocedá del Principáu d'Asturies en collaboración cola Axencia Asturiana d'Emigración.

El coordinador del estudiu, Xulio Fueyo, esplicó que l'estudiu partió de datos del INEM y el SADEI y d'un trabayu de campu.

Acordies colos sos datos, 76.445 asturianos d'ente 16 y 34 años ficieron contratos llaborales fuera d'Asturies ente'l 2000 y el 2005, mientres qu'ente'l 2001 y el 2004, 21.334 persones d'esti tramu d'edá que vivíen n'Asturies cambiaron de residencia, una cantidá menor que Xulio Fueyo xustificó porque les persones que salen fuera tarden en cambiar d'empadronamientu.

El perfil mediu del emigrante mozu asturianu ye polo tanto'l d'una persona con estudios secundarios, ente 25 y 30 años y Madrid y Cataluña como destinos preferentes.

El sector de la construcción ye onde más alcuentren trabayu, un 24,3 %, tando en segundu llugar la inmobiliaria, 22,25%; el comerciu, 12,53% y la hostelería, 10,43 %. Sicasí, Asturies ye, xunto con Salamanca y Granada, una de las primeres provincies emisores de titulaos universitarios. Por xéneros, trátase d'una emigración mayormente masculina, anque d'un tiempu p'acá conséñase una mayor emigración de les muyeres.