Un cursu forma a los ganaderos ecolóxicos asturianos

El Conseyu Regulador de l'Agricultura Ecolóxico (C.R.A.E) y técnicos de la Conseyería de Mediu Rural y Pesca entamaron ayeri na Escuela d'Agricultura de Villaviciosa un cursu sobre Ganadería Ecolóxico de Vacunu de Carne. L'actividá empobínase a ganaderos n'activu interesaos n'adaptar les sos esplotaciones a los requisitos de la Certificación del Conseyu Regulador de l'Agricultura Ecolóxico.

Reconversión de explotaciones a la ganadería ecolóxico, Sistemes de producción, manexu d pastos, Sanidá animal y analís de les canales de comercialización de los productos ecolóxicos son delles de les materies a tratar nesti cursu.

L'agricultura y ganadería ecolóxiques son ún de los frentes más escaecíos y menos trabayaos n'Asturies na llucha por frenar el desaniciu del campu. les esplotaciones ecolóxiques mándense, ente otros criterios, pol de fuxir de la concentración de munches cabeces de ganao en pocu espaciu, casu de les actuales esplotaciones ganaderes industriales, siendo cásique la única posibilidá de supervivencia económica pa una ganadería estensiva qu'emplegue como alimentu la pación de los praos del monte.

Actividaes como esti cursu intenten montar a Asturies nun carru al que yá va tiempu que xubieron otros. Si n'Asturies tuvimos qu'esperar al añu 2.001 pa qu'abrieren les dos primeres esplotaciones ganaderes ecolóxiques empobinaes a ganao de carne, (esistíen otres cinco de lleche) otres comunidaes autónomes sacábennos a esa mesma fecha abonda ventaya. Asina, Extremadura totalizaba nesi mesmu añu 399 ganaderíes ecolóxiques de vacunu de carne, y otres comunidaes de la nuestra rodiada presentaben cifres menos simbóliques que les asturianes, casu de Cantabria, con 29 cuadres ecolóxiques o de Galicia, que nun añu pasó de 5 a 21.